Kane dinhmun chiang lo zel

Harry Kane-a'n season tharah eng club jersey nge a hak dawn tih a la chiang thei lo. Tottenham Hotspur chuan an striker hi chelh ngei an duh, mahse Bayern Munich chuan England captain hi North London club aṭanga lak chhuah ngei tumin an bei ve mek thung.

Kane hi striker hriam leh ṭha bik a ni a, goal khung a harsat lo. Spurs tana goal khung hnem ber pawh a ni hial, mahse nomawi a la chawi miah lo thung, kum 30 mi a nih tawh avangin nomawi chawi a duh a nih chuan club dang a melh a ngai.

Pep Guardiola-a'n Manchester City lamah sengluh tumin nasa takin hma a lo la tawh, mahse Spurs lamin chelh in contract thar a ziak zui. Citizens hian Erling Haaland an la ta zawk a, tunah chuan Kane lam hi an hawi tawh lo.

Striker mamawh Bayern Munich chuan tun hnaiah na takin Kane hi an dawr thung, an dilna hmasa hnawlsak ni mah se tun hnai khan pound maktaduai 81.7 hum chungin an dawr leh a, inremna la siam chiah lo mah se Bavarians hian beisei an neih thu an sawi.

German champion hian Kane hi kum nga chhung atan contract an zawrh, a zawm a nih chuan kum 35 a tlin thlengin Bayern tan a khel thei dawn tihna a ni a, an chesual hle a nih ngawt loh chuan Bundesliga bakah nomawi dang an chawi bawk ang.