Asian Games 2022: Apuia leh Chungnunga an ko

Asia khawmualpuia infiammite inkhawmpui Asian Games 2022-ah India-in football team a tir dawn a, ram tana inlan turin Mumbai City midfielder Lalengmawia Ralte (Apuia) leh East Bengal defender Lalchungnunga te chu koh an ni.

Asian Games 2022 hi September 2022 - May 2022 inkar khan China-ah neih tura ruahmanna siam a ni a, mahse, Covid-19 vanga neih theih a nih loh hnuah September 2023 - October 2023 inkar hian neih a ni dawn a, a official hming atan pawh Asian Games 2022 tih a la ni reng.

Hangzhou, China-a neih tur inelnaah hian infiamna chi hrang hrang 40-ah inelna neih a ni dawn a, India chuan infiamna kutpuiah hian infiammi 800 vel a tir dawn niin phai lam media chuan an tarlang a, Asian Games-a India-in infiammi a tirh tam ber ṭum a ni dawn.

Apuia leh Chungnunga bakah hian Asian Games-ah hian Mizo inlan tur an awm nual dawn. Hockey-ah Lalremsiami, karate-ah Hmangaihsangpuia, taekwondo-ah Lalthlamuanpuia leh Daniel Lalhumthanga te an kal dawn bawk.

Tel leh si!

Asian Games-ah hian a tirah chuan Indian football team hi tirh loh tur an ni. India sorkarin Asian Games-a infiammi tirh dan tur ruahmanna fel tak a nei sa a, "Asian Games-a tel tur chin infiamna chu Asia huap ranking-ah pariatna tal an nih phak a ṭul," tiin an ziak.

Indian football mipa team hi Asia ranking-ah 18-na an ni a, hmeichhe team pawh 10-na an ni. Sorkar tehna aṭang chuan India hi Asian Games-a zin thei lo tur an ni a, hetihrual hian sorkar hian fing takin thu a dah sa tho.

Chutah chuan, "Infiamnaa mithiam bik te leh Sports Authority of India-in ṭul an tih chuan Asia ranking-a number 8 ni phak kher lote pawh tirh theih an ni a, chhan ṭha tak erawh a nei tur a ni," tiin an ziak a, sports ministry lamin a ṭul anga thutlukna an siam theih thu an sawi.

Tun hnaiah Indian football-in nasa takin hma a sawn a, media lamah pawh ngaihven an hlawh thar. Hei vang hian Asian Games-a India tel theih dan tur ngaihtuah a ni a, a tawpah chuan India-in mipa leh hmeichhe team an tir dawn ta.

Chaubey-a hnathawh

Asian Games 2018-ah khan India rama football thuneitu sang ber All India Football Federation (AIFF) chuan theihtawp chhuahin hma a lo la tawh a, AIFF hian sum senso chu tum vek an inhuam thu thlengin an thlen.

Mahse, sorkar lamin rem a ti tlat lo a, Indian football team an zin thei ta lo. Kuminah erawh thawnthu a danglam ta. AIFF president Kalyan Chaubey chuan Asian Games-a Indian team tirh an nih theih nan hian hma a la a, theihtawp a chhuah.

Chaubey hian union home minister Amit Shah leh sports minister Anurag Thakur te hmuin a titipui a, Asian Games-a Indian football team tirh dan tur ngaihtuahpui turin a ngen. Chaubey hi BJP a ni a, Indian Olympic Association-ah CEO leh joint secretary a ni tel bawk.

Indian footballer hlui Chaubey-a'n a hmelhriat neih ṭhat leh sorkar lai BJP lam ṭang a nihna thiam takin a hmang a, a tawpah chuan Indian football team-in Asian Games an khelh phah dawn ta.

Apuia a chiang lo

India coach Igor Stimac-a'n Asian Games-a inlan turin player 22 a ko a, a koh zingah Apuia leh Chungnunga an tel. Footballer pahnih tan Asian Games khelh hi thil châkawm a ni a, chutihrual chuan Apuia hian inelna a hmachhawn thei ang em, a la chiang lo.

Apuia chuan, "Asian Games hi ka la inlan ngai lohna a ni a, khelh chu thil châkawm tak a ni. Mahse, ka thei kher ang em, ka la hre rih lo. AFC Champions League nen a inrual dawn a, club lam hian min chhuah phal kher lo mai thei," tiin Vanglaini a hrilh.

Mumbai City hian Thailand-ah pre-season an hmang a, tunah erawh India lamah an lo kir leh tawh. Apuia hi nipui chawlh lai khan hliam vangin India tan a inlan tam thei lo a, Vaivakawn tlangval chuan a dam chian tawh thu a sawi.

Islanders (Mumbai sawina) hian August 5 aṭangin Durand Cup an khel dawn a, AFC Champions League hi September aṭanga khelh ṭan tur niin, Asian Games pawh September-a ṭan tur a ni a, Apuia dinhmun a chiang lo.

A vawi khatna

Asian Games khel turin Lalchungunga pawh koh zingah a tel a, Durtlang tlangval hian age level-ah pawh Blue Tigers tan a la khel ngai lo - East Bengal defender tan chuan duhthusam thleng dik, tiin a sawi theih hial ang.

Chungnunga chuan, "India tana inlante hi chu ka beisei ve ṭhin a ni a, mahse, season hmasaa kan team chet dante enin tun hnaiah chuan ka beisei hran lo. Koh ka ni ve hi ka lawm takzet a ni," tiin Vanglaini a hrilh.

Centre back leh right back-ah pawh khel thei Chungnunga hian Aizawl FC aṭanga a professional zinkawng zawh ṭanin, 2021 khan Sreenidi Deccan a zawm a, season khat a khelh hnuah 2022-23 season kha ISL club East Bengal-in loan-in an hawh.

Kolkata club-ah a chet ṭhat avangin Chungnunga hi East Bengal hian an la nghet zui a, season thum chhung atana contract ziahpuiin, kum 2026 thleng a khel dawn - season hman zawh takah khan league match 19 zet a khel.

Senior player?

Asian Games khel tur India squad-ah Lallianzuala Chhangte a tel lo a, tam tak zawhnaah engvanga Lunglei tlangval hi tel lo nge, tih awm thei a ni - Asian Games-ah hian Under-23 team tirh tur a ni a, senior player pathum bak an awm a thiang lo.

India coach Stimac-a'n senior player hmun ruak pathum hi season hmasaa Bengaluru tana khel player pathum hmangin a hnawh khat a, a hmaah Sunil Chhetri awmin, tlarhnungah Sandesh Jhingan koin, goalkeeper atan Gurpreet Singh Sandhu a ko bawk.

Player dang zawng erawh kum 23 hnuai lam vek an ni a, India vanneihna erawh senior team tana inlan tawh zingah kum 23 hnuai lam an awm nual avangin Blue Tigers squad hi senior team squad ang deuhthaw a ni thei.

Tlarhnungah Anwar Ali, Akash Mishra leh Naorem Roshan Singh te chu senior team tana tawnhriat nei tawh vek an ni a, midfield-ah Apuia bakah Jeakson Singh, Suresh Singh, Mahesh Singh, Rahul K.P leh Amarjit Singh te pawh India tana inlan tawh vek an ni a, tlarhmaa Aniket Jadhav leh Rahim Ali pawh senior team tana khel tawh an ni.

India Squad

Goalkeepers: Gurpreet Singh Sandhu (Bengaluru), Gurmeet Singh (Hyderabad FC), Dheeraj Singh (FC Goa).

Defenders: Sandesh Jhingan (FC Goa), Anwar Ali (Mohun Bagan), Narender Gahlot (Odisha FC), Lalchungnunga (East Bengal), Akash Mishra (Mumbai City), Roshan Singh (Bengaluru ), Ashish Rai (Mohun Bagan).

Midfielders: Jeakson Singh (Kerala Blasters), Suresh Singh Wangjam (Bengaluru), Apuia Ralte (Mumbai City), Amarjit Singh Kiyam (Punjab FC), Rahul KP (Kerala Blasters), Naorem Mahesh Singh (East Bengal).

Forwards: Sivasakthi Narayanan (Bengaluru), Rahim Ali (Chennaiyin), Aniket Jadhav (Odisha), Vikram Partap Singh (Mumbai City), Rohit Danu (Bengaluru), Sunil Chhetri (Bengaluru).