Italy ngamtu South Africa an tlang

Hmeichhe World Cup group stage pawh a hmawr bawk a hnai chho zel - nimina inkhel ngaihven hlawhah South Africa chuan 3-2 a Italy hnehin last 16 an lut a, Italy tan beisei tur a awm ta lo.

Team pahnih intawn hma hian Italy-in point thum an nei a, South Africa hian point khat an nei thung - Italy tan last 16 lut turin draw a tawk a, South Africa tan chak ngei ngei a ngai thung.

Italy hian minute 11-naah Arianna Caruso penalty hmangin goal hmahruai an khung zui a, awlsam takin an tlang mai dawn niin a lang hman. Mahse, a vawi khat nana Italy tana World Cup-a inlan Benedetta Orsi chuan an lamah ti lutin, SA tan si phurh a sutsak.

South Africa tan Hildah Magaia chuan second half-ah khung belhin 2-1 a ni a, mahse, Italy hian goal hmahruai khungtu Caruso hmangin si phurh an sut.

Minute 90 thlengin goal dang a lut lo a, 2-2 in inkhel tawp ta se, Italy chu tlang tur an ni. Mahse, South Africa tan thilmak a thleng a, Thembi Kgatlana chuan hun pek belh minute hnihnaah chakna goal a khung!

Italy tan chhanletna hun a awm tawh lo a, a vawi khat nana World Cup-a hnehna changtu South Africa chuan last 16 an lut. August 6 hian round of 16-ah Netherlands nen an inkhel leh ang.

Group G inkhel dangah Sweden chuan 2-0 in Argentina an hneh a, hmahruaitu ni chungin last 16 an lut chiang bawk. Sweden tan Rebecka Blomqvist leh Elin Rubensson ten goal khat ve ve an khung a, mipa lama world champion Argentina hmeichhe team hian point khat chiah hmu chungin World Cup an mangṭha.