Asian Games-ah Mizo paruk

Hangzhou, China-a neih tur Asian Games-ah hian tun dinhmuna Vanglainiin a hriat theih chinah Mizo parukin inelna an hmachhawn dawn a, Mizoram infiamna khawvel tan hmasawnna a ni.

Karate: 

Hmangaihsangpuia chu Asian Games 2022-ah hian a inlan dawn a, Kawrtethawveng tlangval hi -67kg (Senior male individual kumite) huangah a khel ang. Asian Games-a karate aṭanga India aiawh tur thlanna hi June 19-20, 2023 khan IG Stadium, New Delhi-ah neih niin, hetah hian All Mizoram Karate Association (AMKA) chuan Sangpuia hi a tir a, a inlanna category-ah Sangpuia hi chungnung berin thlan a ni ta a ni.

Taekwondo:

June 18 khan Asian Games-a India aiawh tur thlanna neih niin, Nadiad, Gujarat-a neih hunah hian Poomsae inelnaa khel turin Lalthlamuanpuia, Venghlui leh Daniel Lalhumthanga Chhinga Veng te chu thlan an ni. Thlamuanpuia hian individual inelna a hmachhawn ang a, Daniel-a erawh reserve player a ni dawn thung.

Hockey:

India ram hmeichhe hockey hi Lalremsiami chanchin tel lo chuan a kim tawh lo. Hockey hmeichhe team chuan Asian Games hi an hmachhawn leh ngei dawn a, Kolasib nula Lalremsiami pawh inelna hmachhawn tur zingah a tel. Kar hmasa lawkah khan Remsiami hian England lakah hattrick a siam a, 100th Anniversary Spanish Hockey Federation - International Tournament-ah India chu England lakah 3-0 in hnehna a chanpui.

Jeremy a tel dawn lo

Asian Games 2022 khel turin Jeremy Lalrinnunga chu tling chiang sa ni mah se Mizo weightlifter hian hliam vangin inelna hi a hmachhawn thei dawn lo a, India tan medal beiseina pakhat chu a bo, tiin a sawi theih.

Hetihlai hian Asian Games-a tel thei tura beisei Lalchhanhimi pawh hliam vangin he inelnaah hian a inlan thei dawn lo bawk a, Mizoram weightlifting tan tun Asian Games-ah chanchin lawmawm hriat tur a awm lo!