West Indies tan India an ṭha mah mah

India-in ODI match hnihnaah West Indies hneh lo mah se match thumnaah erawh 200 runs zetin an sawp a, 2-1 in series an la. Men in Blue hian captain Rohit Sharma leh Virat Kohli te an awltir a, player naupang zawkten an theihna lantir nan an hmang.

Rohit chawlhtir a nih laia captain hna chelhtu Hardik Pandya chuan, "Virat leh Rohit te hian match an khel tam a, hahdamtir an ni. Third ODI-ah nung takin an khel thei ang," tiin ODI vawi hnihna an chak loh zawhah a sawi a, mahse ODI vawi thumnaah pawh an khel chuang lo.

Ṭhumvawrah West Indies an chak a, vawm hmasak an thlang. Chutihrualin India hian bat hmasak an duh hrim hrim. Brian Lara Cricket Academy-ah opener pahnih Ishan Kishan (77) leh Shubman Gill (85) te an che ṭha a, an pahnih hian 143 runs an siam hman.

Sanju Samson (51) leh captain Pandya (70*) te an che ṭha zui a, over 50-ah 351 runs an siam. Windies tan target a sang mah mah a, opener Brandon King-a'n run khat pawh a siam lo.

Mualneitu zinga run siam tam ber, Gudakesh Motie-a'n thi loin 39 runs siam mah se player dang che ṭha an awm lo. Windies hi over 35.3-ah 151 runs chauh siamin an thi vek a, an chak lohna zat pawh 200 runs lai a ni.

India captain Hardik Pandya chuan, "Virat leh Rohit te hi team tan an pawimawh reng a, player naupang zawkin khelhna chance an neih hi a ṭul ve bawk," tiin a sawi. Opener Ishan Kishan chu player of the series-a thlan a ni.

India leh West Indies te hian T20 series an khel chhunzawm dawn a, match nga an khel dawn. Zanin dar 8:00 hian Brian Lara Cricket Academy-ah match hmasa ber an khel ang.