Champion lai Busta inlan dawn lo

Tun kar tawp aṭanga khelh ṭan tur ATP Toronto Masters-ah champion lai Pablo Carreno Busta a inlan thei dawn lo a, ani bakah hian player langsar dang Nick Kyrgios leh Denis Shapalov te an inhnukdawk bawk.

Season hmasa final-ah khan Carreno hian Hubert Hurkacz chu 3-6, 6-3, 6-3 in a hneh a, a vawi khat nan Masters 1000 title a la. Tun season erawh hliam vangin a inkhel mumal lo, match li chauh a la khel hial - a nomawi humhim tur pawhin a inlan thei lo a ni.

Australian tlangval Kyrgios pawh a ban rek hliam a la dam thei lo. Wimbledon bakah Washington Open-ah pawh a inlan thei lo, tunah chuan ATP Toronto Masters pawh a khel thei dawn lo.

Canadian player Shapovalov pawh a khup hliam vangin a inlan thei dawn lo. Tournament buatsaihtu lam chuan player pathum aiah hian Emil Ruusuvuori, JJ Wolf leh Kei Nishikori te chuan main draw an khel nghal thei thung dawn tih an sawi.