Chelsea player thar chhuak leh nghal mai thei

Chelsea chuan Lesley Ugochukwu chu Rennes aṭangin pound maktaduai 23.2-in an lalut a, mahse Blues coach Mauricio Pochettino chuan an player thar hi loan hmangin a chhuak leh nghal mai thei tih a sawi.

Ugochukwu hi kum 19 mi chauh a la ni a, inzir tur a la ngah. Rennes tan Ligue 1 match 47 a khel tawh a, league match bakah hian Europa League pawh a khel tawh, atan North London club lama hmun pawimawh chan nghal chu a harsa dawn.

Pochettino chuan, "Kan zinna hmunah a training ang a, chumi hnuin London lamah a training kan en leh ang. Player naupang leh theihna nei sang tak a ni a, chutihrualin nipui bazar inhawn chhung chu a chet vel dan uluk takin kan thlithlai ang," a ti.

Argentine coach Poch hian tun nipui bazar chhungin Christopher Nkunku leh Nicolas Jackson te bakah Brazilian rawlthar Angelo Gabriel te a neih belh tawh a, midfielder Moises Caicedo chu Brighton aṭanga lak an tum mek bawk.

An neih sa zingah Kai Havertz, Mateo Kovacic, Mason Mount, N'Golo Kante, Kalidou Koulibaly, Edouard Mendy, Ruben Loftus-Cheek, Pierre-Emerick Aubameyang leh Christian Pulisic te chu an chhuak fel tawh thung.

Pochettino chuan, "Team thar kan zawm a nih chuan eng emaw danglamna hi chu kan tawng tur a ni. Tun dinhmunah chuan player siksawi dan chungchanga club chet danah hian ka lawm, season ṭan hma ngeia kan inchinfel hman ka beisei," a ti.