Atletico an chak ve ta

Inelna hrang hranga match nga zet a zawna hnehna an chan zawh loh hnuah Atletico Madrid fan-te tan lawmna hun a her chhuak ve ta a, Inrinni zan khan league match-ah Granada chu 1-0 in an hneh

. 

Atletico Madrid tan Álvaro Morata, Diego Costa leh Joao Felix chu hliam vangin an inlan thei lo vek a,  Diego Simeone-a enkawl team hi an mangchhiain a ṭinsan dawn lo niin a lang. 

Mahse, Argentine coach hian tlarhmaah Vitolo leh  Angel Correa-te a inkawptir a, minute ruknaah a duh ang a hmu nghal - Correa chuan an player chhuanvawr te awm loh laiin mawhphurhna chu zo takin a la a, goal a khung. 

Kum 24 mi Correa goal khung hi Koke siamsak a ni a, kum 28 mi Koke hi thla hnih dawn hliam vangin a inlan tawh lo - a lo kir lehna inkhelah erawh a pawimawhzia a pholang nawn. 

Atletico-in hnehna an chan avangin season thara Champions League khelh beiseina a nung thar a, nizana Barcelona leh Atletico Madrid inkhel result erawh kan hre hman lo thung.