GIG Motors I Day Football 2023: Venghnuai hnehtu Chanmari tan beiseina thar

Chanmari FC-in Aizawl FC an hneh loh hnuah FC Venghnuai lakah goal hnih an phur a, dinhmun chhe taka an awm hnuah an tho chhuak. K. Malsawmkima hote hian nimin GIG Motors I Day Football 2023 inkhelah 3-2 in hnehna an chang a, semifinal lut turin beiseina thar an nei bawk.

RG Stadium inkhelah hian FC Venghnuaiin Jerry Lalchhanchhuaha leh F. Lalchhanchhuaha te hmangin goal hnih an khung hmasa a, Chanmari FC-in Rohlupuia, Lalpianthanga leh Khawpuimawia te goal hmangin an chhanglet a, 3-2 in inkhel a tawp.

Chanmari leh Venghnuai ten point thum ve ve an hmu a, Mala hoten match hnuhnung berah point la hmu lo Electric Veng an hmachhawn dawn. Venghnuai erawhin point ruk hmu tawh Aizawl FC an hmachhawn thung ang.

Venghnuai an thiam

Chanmari FC-in Kelkang tlangval Lalkhawpuimawia (Mapuia) bul la ṭantir lo mah se Aizawl FC an hneh loh ṭuma starting eleven an siksawi hret. Bul ṭantu zingah Bawngkawn tlangval Lalnuntluanga a rawn tel thung.

Mala hote hi rinkai zawk ni mah se Venghnuaiin bul an ṭan ṭha zawk a, coach James Lalrammuanawma hoten inkhel an thunun hle. Chanmari tlarhnung an talbuai a, an insiamrem theih lawk loh avangin minute rukna lekah Venghnuaiin corner kick aṭangin Jerry hmangin goal an khung.

Goal luh hnuah pawh Venghnuai bawk an chungnung a, goal erawh an khung belh thei lawk lo. Minute 26-naah captain C. Lalramdinmawia ball pet luh chu box chhungah F. Lalchhanchhuaha'n khawih kawi zeuhin goal kilah a lut a, 2-0 a ni. Venghnuai dinhmun a ṭha hle.

Chanmari an vannei

Venghnuai an fimkhur lo hret a, goal an khung aṭanga second tam pawh a kal hmain goal an chhuah lehnghal. Ramdina'n ball a dan per sual avangin Rohlupuia'n (Mapuia) siphurh a sut ṭhen. Minute 26-naah 2-0 a ni a, minute 26-naah tho 2-1 a ni!

Second half ṭan chiahah Chanmariin goal khung tumin player pahnih an thlak a, Kelkang tlangval Mapuia a rawn lut nghal. Minute 47-naah Chanmari an vannei a, Mapuia'n goal ruakah goal zawnah pet lo mah se ball-in Venghnuai player kut a fuh avangin referee-in penalty a pe. Penalty aṭangin Lalpianthanga'n Chanmari siphurh a sut zo a, first half-a Venghnuai khelh ṭhatna zawng zawng chu vawi hnih chetsual vangin engmah loah a chang der.

Chanmari an insiamrem zel a, Lalthangliana (AB-a) leh Tluanga te hmangin second half-ah inkhel an thunun ta zawk. Minute 70-naah AB-a ball vawrh luh chu box chhungah Rohlupuia'n changin Mapuia tan a pe let a, Kelkang striker hian keeper pet khumin goal a khung.

Goal dang a luh belh loh avangin hun tawp lamah Chanmari an talbuai a, Venghnuai lamin corner kick leh freekick hmangin chance ṭha an rawn nei a, a him hlauh.

Chanmari pawhin chance ṭha bik an nei a, player pathumin defender pakhat chauh an hmachhawn hnuah Mapuia'n a hun ṭha neih a hmang ṭangkai thei lo. 3-1 in inkhel a tawp a, Chanmariin an elpui Venghnuai an hneh avangin semifinal lut turin an dinhmun a ṭha sawt.