Aizawl FC-in semifinal an hnaih

GIG Motors I Day Football 2023-ah I League club Aizawl FC-in team ṭha bik an nihna an lantir zel a, nimin tlai khan Electric Veng FC 3-0 in an hneh. AFC tan Lalrinzuala, Augustine Lalrochana leh F Lalramsanga ten goal khat ṭheuh an khung.

RG Stadium-a inkhelah Electric Vengin bul an ṭan chhe lo a, goal khung hmasa zawk thei dinhmunah ding mah se Aizawl FC defender Rohmingthanga'n goalline aṭangin ball a pet chhuak. I League club an insiamrem vat a, Lalrinzuala'n minute 12-na lekah goal kilah tak ball dahin club thar tan match hnih lekah goal thum a khung der.

Minute thum hnuah Rinzuala'n a theihna sang tak a pholang leh a, Serchhip tlangval hian mual veilam aṭanga ball la lutin a cross ball ṭha chu Augustine Lalrochana'n goal ruakah a khung. Electric Veng an ṭang thei a, second half-ah insiamṭha viau mah se AFC keeper Joel Lalramchhana tan hna an siam thei lo.

Minute 61-naah AFC midfielder Lalramsanga'n goal thumna a tauh lut leh a, Electric veng tan thawhchhuah ngaihna a awm tawh lo. I League club tan Lalbiakdika'n goal ban a pet per a, Zomuansanga pawhin chance ṭha a hlah. BD-a leh Zomuana ten club thar tan goal an la khung lo. Nimin inkhelah hian player thar C. Lalmuanpuia an luhtir bawk.

Aizawl FC hi match hnih khelhah chak ve ve mah se tla ve thei tho an la ni. Match hnuhnung berah FC Venghnuai an hmachhawn dawn a, I League club hi an chak lo a, Chanmari FC-in Electric Veng an hneh bawk chuan tla thei an ni. Mahse, Aizawl FC hi an goal difference a ṭhat avangin tla thei lo tluka ngaih an ni tawh.

Electric Veng pawhin point la hmu lo mah se an la tla bik lo. EFC hian Chanmari FC an hneh a, Aizawl FC-in FC Venghnuai an hneh theih bawk chuan semifinal luh theihna kawng a la inhawng. Mahse, an goal difference vangin beisei erawh an nei sang tawh lo ang.