Duhtakte u, kha zawng kha a ni e: Buffon a chawl ta!

"Kha zawng kha a ni e," tiin goalkeeper ropui Gianluigi Buffon chuan inkhelh a chawlhsan thu a puang a, kum 45 mi keeper hian football khelmualah pek leh chuan tur a neiin a hre tawh lo.

Buffon chuan, "Ṭhiante u, kha zawng kha a ni e. Engkim min pe a, kei pawhin ka theihna zawng zawng ka hlan let che u a nih kha - he thawnthu hi nangmahni nena kan ziah ho a ni," a ti a, inkhelh a chawlhsan thu a puang.

Italian keeper ropui hian kum 45 a nih thlengin khelmualah hun a hmang a, tunah chuan zinkawng thar zawh turin a glove chu a khai ta - ni e, Gigi-a'n si ban a nghak lai i hmu leh dawn tawh lo.

Ti mai hian Gigi football zinkawng chu thlah a ni a, a duhthusam ang tak erawh a ni ngei ang. A professional zinkawng a zawh ṭanna Parma-ah bawk a career hi a mangṭha a, Serie B club hmangin football a thlah.

Thawnthu ngaihnawm

Kum tam a liam ta - hmanni lawk emaw tih lai khan kum 28 zet a lo ni reng tawh! Kum 1995 khan amah chher hriamtu Parma tan Buffon-a'n a professional match hmasa ber a khel a, kum 2023-ah a glove chu dah ṭhain football a mangṭha ve ta chiah.

Gigi hian kum 2001 thleng Parma tan hian a khel a, match 220 zet inlansakin a hming a chher hle. Hetih chhung zawng hian Coppa Italia, Supercoppa Italiana leh UEFA Cup-ah te champion nomawi a chawipui a, kum 2001 khan Juventus chuan pound maktaduai 32.6-in an lei chhuak.

Tunlai khawvelah £32.6mtd hi striker vantlang man ang zat chauh a ni mai thei. Mahse, hetihlai chuan heti zat man player ni tur chuan mi chungchuang bik nih a ngai a, Buffon hi a hunlaia goalkeeper man to ber a ni - mahse, Juventus-in an tihsual lohzia hrechiangtute chu kan ni.

Turin club tan hian Serie A nomawi 10 zet a chawi a, Serie B nomawi vawi khat chawipuiin, Coppa Italia (5) leh Supercoppa Italiana (6) nomawite a chawi a, Champions League erawh final vawi thum zet a khel chungin nomawi a chawi miah lo.

Hun hnuhnung

Buffon hian Juve tan season 17 zet khela match 656 a inlansak hnuah, kum 2018 khan Paris Saint-Germain a zawm a, French club tan match 25 khelin Ligue 1 leh Trophée des Champions nomawi a chawipui a, season khat lek hnuah Juve-ah bawk a kir.

Serie A club tan season hnih khel lehin, match 29 a inlansak a, June 2021 khan rin loh takin amah chher hriamtu Parma lamah a kir - Parma hi Serie A-ah hruaikir tum viau mah se a hlawhtling lo a, season hman zawh takah khan playoff semifinal khelin, Claudio Ranieri enkawl Cagliari an ngam lo.

Gigi hian February 5, 2022 khan Serie B match-ah Benevento hmachhawnin, goal a chhuah lo a, football chanchina mipa keeper zinga clean sheet vawi 500 nei tling hmasa ber a ni - Juve tan vawi 322 neiin, Parma (92), PSG (9) leh Italy (77) ten an dawt.

February 28 khan kum 2024 thleng atan a contract pawtsei mah se, season hman zawh takah khan hliamin a tlakbuak ve reng a, Italian keeper hian khelmuala inland reng theiah a inngai ta lo - football goalkeeper hringnun chu a mangṭha ta.

Mangṭha legend

Italy national football team chuan, "Kan number 1 hnenah lawmthu kan sawi a, Gigi, kan lawm e," tiin an keeper hlui hi an thlah - Italy tan match 176 khelin, international football-a goalkeeper match khel hnem ber a nih bakah, Italy tana inlan hnem ber a ni bawk.

Gigi hian ram tan World Cup nomawi hial chawiin, kum 2006 khan a champion pui a, kum 2012 khan Euro final khel mah se an chak zo lo thung. Serie A Goalkeeper of the Year-ah ringawt pawh vawi 13 thlan a ni a, FIFA FIFPro World XI-ah vawi thum a lang thei.

Serie A chuan, "Football thawnthu ngaihnawm a awm a, Gigi Buffon a awm bawk. Chu thawnthu ngaihnawm tak chu a inṭanna hmunah vek a tawp ta," an ti a, Serie A Team of the Year-ah vawi nga ngawt a lang hman.

PSG tana a khelhpui ṭhin Kylian Mbappe pawhin Buffon hi thlahin, "I zinkawng ropui taka ka tel ve thei kha ka lawmin, ka inchhuang takzet a ni. Rangkachak ang maia hlu mi ropui, min fuihna zawng zawngte kha ka damchhung zawngin ka hre reng tawh ang," a ti.

Juve & Parma

Gigi chanchin sawi a nih apianga sawi tel tawh tur chu Juventus leh Parma an ni a, club pahnih hian an legend hi a phu ang ngeiin ropui takin an thlah. Juventus chuan, "Legend chuan a glove a dah ṭha ta. Goal tur i dan zozai te, i hlim hmel te leh i mize duhawm takte kha kan hre reng ang," an ti.

Serie A club chuan sawi zawmin, "Football number 1 awm tawh zawnga ṭha ber thlah nia football chanchin sawi chu a harsa takzet. I ṭha ber a ni mai lo a, chu ai pawh chuan i ropui zawk a ni. Goalkeeper ropuina pholangin, midangten an entawn tur leh nih an châk êm êm tur i hnutchhiah a ni.

"Player zinga kan jersey ha rei ber leh nomawi min chawipui hnem ber i ni a. Kan club tana inlan hnem ber pahnihna niin, clean sheet ngah ber i ni bawk. Kan captain i ni a, kan innghahna lungpui i ni a, kan Gigi kha i ni e," an ti a, an legend an thlah thiam hle.

Parma president Kyle Krause chuan, "A career duhawm tak, tuma tluk rual lohah khan khelmual chhung leh pawnah a theihna leh thiamna, he game a hmangaihna hi nasa takin a lantir a ni. Parma Calcio chuan champion dik tak leh kan ṭhian ni bawk hi a career duhawm tak avangin kan lawmpui a ni," a ti a, Gigi football player zinkawng chu a tawp ta.