Goal khung ban zai rel lo Lionel Messi

Lionel Messi hi zawng a danglam a ni, football khel tura piang bik a nihna hi kan hmu thar zel ṭhin. Nimin zing khan Inter Miami captain hian Orlando City lakah goal hnih a khung a, a team hi 3-1 in hnehna a chanpui.

Major League Soccer (MLS) an chawl lailawk mek a, hetihlai hian MSL club leh Mexican club tan Leagues Cup an khel, inelna neih laiah Messi hian match thum khelin goal nga a khung der tawh - Inter Miami hi last 16 a hruai lut.

Messi an neih hma khan Inter Miami hi an talbuai takzet, an match hnuhnung 11 zetah chak ni hmel an hmu miah lo. Mahse, tunah chuan Messi an neih hnua match an khelh hoah an la chak vek hial a ni.

Argentina captain Messi hian khelmual chhung leh pawn lamah nghawng na tak a nei. Coach thar Tata Martino an nei phawt, ani hian Phil Neville a thlak. Coach bakah hian Barca lama a khelhpui tawh Sergio Busquets leh Jordi Alba te an neih belh bawk.

Goal khung zel

Footballer-te vanglai hi a rei lo a, kum 30 an tlin hi chuan an vanglai an pel chhunzawm deuh mai ṭhin, kum 36 mi Messi pawh hi chawl tawh ni se la a demawm loh. Football huangah a tih tur ang a hlen chhuah thu pawh a lo sawi tawh a ni.

Mahse, chawl mai loin a la inkhel zel - Orlando City lamah pawh hian Robert Taylor-a ball pek chu a awmin a lo dawng a, ball hian lei a thlen leh hmain goal-ah a hlap lut pawp, hun rei lote chhungin thutlukna a siam dik hle.

Orlando lamin Cesar Araujo hmangin si phurh an sut a, 1-1 in chawlhlawk an hmang. Second half minute 51-naah Miami lamin penalty an hmu, captain Messi chu pet tura ngaih a nih laiin tun hnaia goal khung tluang lo striker Josef Martínez a kian.

Martinez hian penalty a khung hnuah a la duhtawk mai bik lo, lawmthu sawina ni awm takin Messi tan a siamsak ve leh thung. Barcelona captain hlui hian ball kang lai bawk a hlap lut leh a, harsa vak loin an chak tlang.

Newcastle defender hlui, tuna Inter Miami tana khel mek DeAndre Yedlin chuan, "Player dang zawng zawng inrintawkna a siamsak vek, hmun harsa leh khirh deuha a awm lai pawhin ball pe ila a lo chingfel thei zel," tiin Messi a fak a, an khingpui ten an hlau tih a sawi bawk.

Messi inkhel hi club neitu zinga mi David Beckham chuan mual sir aṭangin hlim takin a lo en ṭhin. England captain hian Messi an la lut thei chu a nuna hun hlimawm berte zinga mi a nih thu a lo sawi chhuak hial tawh a ni.

Leagues Cup hi knockout hmanga inelna niin Inter Miami hian Pathianni zingah FC Dallas an hmachawn leh dawn. An inkhelhna tur hi Toyota Stadium, Texas a nih avangin hna erawh a hautak hret tawhin a rinawm.

A chung berah Messi

Lionel Messi che vel chuan nghawng a nei na zel, a kalna lam apiangah zuitu an awm a ni satliah lo, sum sengin an zui. Paris Saint Germain chhuahsana Inter Miami a zawm khan, club thar a neih aṭanga jersey hralh hnem ber record a siam.

LeBron James-a'n Cleveland Cavaliers aṭanga Los Angeles Lakers a zawm khan, team thar a neih aṭanga darkar 24 chhunga jersey hralh hnem ber record a lo siam tawh, he record hi Super Bowl vawi sarih champion tawh Tom Brady-a'n a rawn khum.

NFL legend Tom Brady hian kum 2020 khan New England Patriots aṭangin Tampa Bay Buccaneers a zawm a, hemi ṭum hian James-a record hi a rawn khum a, an ram United States chhungah phei chuan a thawm a na zual rem rem hle.

James leh Brady te sulhnu a turu hle, mahse anni pahnih hian ngam loh an nei - a hming chu Cristiano Ronaldo a ni. Ronaldo hian kum 2021 August thla khan Juventus chhuahsanin a club hlui Manchester United zawmin a kir.

Khawvel huapin Man United hian ṭantu an ngah a, an player ropui Ronaldo hian mimala ṭantu a ngah bawk avangin a thawm a na zual. Club thar neih aṭanga darkar 24 chhunga jersey hralh hnem record chu a rawn khum chiang hle a ni.

Ronaldo-a record hi khum harsa tawh tak tura ngaih a ni, a chhan chu amah ang bawka player langsar Messi chu kum upa leh chuai lam a ni tawh a, a tan club lian zawm a harsat bakah bazarah hralh tla lo zawk tur niin a lang.

Mahse, khawvelin Messi a dahsanzia a takin kan hmu. Argentina captain hian Major League Soccer (MLS) team lian ni lo, an league khelh laiah pawh a hniam ber ni lai Inter Miami a zawm a, beisei phak bakin nghawng erawh a nei lian hle.

ESPN FC-in Fanatics kaltlanga zirchianna an neih dan chuan, tun hma lama darkar 24 chhunga jersey hralh hnem record lo awm tawh zawng zawng hi Messi chuan a rawn khum fai vek a ni.