Hnathawh tur kan la nei - VVD

Liverpool captain Virgil van Dijk chuan season ṭan hmaa insiamrem an la mamawh thu a sawi a, pre-season match-ah Bayern Munich chu 4-3 a an ngam loh avangin Dutch defender hi a lawm lo.

Nilaini zan khan Singapore-ah Liverpool leh Bayern an intawng a, Reds hian Cody Gakpo leh VVD hmanga goal khungin, 2-0 in hma an hruai. Mahse, Bayern hian Serge Gnabry leh Leroy Sane hmangin si phurh an sut a, chawlhlawkah 2-2 a ni.

Second half-ah pawh Reds hian Luis Diaz hmangin goal hmahruai an khung leh a, mahse, German club hian Josip Stanisic leh hun pek belha Frans Kratzig goal hmangin an chhang leh a, German champion-in hnehna an chang daih.

VVD chuan, "Thil ṭha tam tak hmuh tur a awm a, chutihrual chuan hmasawnna tur tam tak a la awm bawk. Bayern hi team ṭha tak an ni a, vawi khat lek i tihsual pawhin an hrem mai ang che - chu chu vawiina thil thleng kha a ni.

"Hnathawh tur kan la nei a, chutiang tak chuan kan thawk bawk ang," a ti a, an result-ah a lawm lo - Reds hian pre-season-ah goal 15 zet khung tawhin, an lamah goal 10 a lut tawh thung a, season danga an buaina kha a la ngai reng!

Jurgen Klopp-a team hian goal khung chu an thei a, a chhuah lam an thei tel hi a buaithlak! VVD chuan, "Kan khingpuiten tihsual an neiha hrem turin quality kan nei a, kan ti reng bawk. Vanneihthlak takin result pawimawh tak a ni hran lo a, kan tan chuan inenchhinna zel a ni a, inzir belh zel a ngai.

"Training kan nei hautak êm êm a, match tinah set piece pawh kan zir reng. Kei pawh goal hmaah tun aia ka hriam a ngai a, ka inzir reng a ni. Level sang bera khelh a, team leh player ṭhate nena inel kan duh. A chang chuan kan tihsual vangin min hrem a, mahse, pre-season kan la hmang chauh - chance pawh kan ngah a ni," a ti.

Liverpool leh Bayern inkhelah hian midfielder thar Alexis Mac Allister chu a bai chhuak a, mahse, coach Jurgen Klopp chuan Brighton & Hove Albion aṭanga an lakluh player dinhmun chu ngaihtuahawm a nih loh thu a sawi - Liverpool tan hian player thar Dominik Szoboszlai pawh a inlan.

Reds hian August 7 zanah German second division club Darmstadt nen pre-season match an khel leh ang a, August 13 zanah Chelsea nen season thara an league match hmasa ber an khel ang.

Liverpool tana inlante:

Alisson; Alexander-Arnold (Gomez 62′), Matip (Konate 46′), Van Dijk (Quansah 75′), Robertson (Tsimikas 62′); Jones (McConnell 75′), Mac Allister (Nunez 46′), Szoboszlai (Clark 75′); Jota (Diaz 46′), Salah (Doak 75′), Gakpo (Elliott 62′)