Season thar bul ṭan lo tur Jesus

Arsenal striker Gabriel Jesus chu a hliam tenau zai a ni a, coach Mikel Arteta chuan Premier League season thar bul ṭan hunah Jesus hi a inlan ve hman dawn lo tih a sawi chiang.

Nilaini zan khan Gunners hian season thar inbuatsaihna hnuhnung atan AS Monaco chu Emirates Cup an khelhpui. Emirates Stadium-a inkhelah hian Jesus a inlan lo, a aiawha lut Eddie Nketiah chuan goal khat a khung.

Arsenal leh Monaco hi 1-1 in an inhnehtawk a, penalty shootout neih zui niin Gunners hi 5-4 in an chak. Pre-season hmang ṭha viau mah se kum bul an ṭan dawn taka Jesus inhliam leh ta hian an ngaihtuahna chu a ti thui viauin a rinawm.

Arteta chuan, "Zing karah khan a dinhmun endik a ni a, vanduai thlak takin a khup a na, mahse na tak erawh a ni lo. A chawlh chen tur sawi lawk theih a ni lo a, chawlhkar eng emaw ti chhung chu a chawlh a ngai dawn.

"Amah leh club tana ṭha ber turin thutlukna kan siam a ngai, a rang thei ang bera a inkhelh theihna tur kan ngaihtuah tel a ngai bawk. Chuvangin a chawlh rih hi kan tan a ṭha ber," tiin a sawi.

Monaco lakah hian Eddie Nketiah chuan captain armband a hreng a, an player thar pahnih Declan Rice leh Jurrien Timber te chuan a vawi khat nan inkhel bul an ṭan; Kai Havertz pawh bench aṭangin a inlan bawk.

Season hmasa khan Jesus hi hun pawimawh laiin a lo hliam tawh bawk, tun season chu Nketiah chungah mawhphurhna a tla leh phawt dawn tihna a ni. Hale End chhuak a ni bawk a, team khelh dan phungah chuan Nketiah tan buaina tur a awm lo ang.

Chutihrualin, Arsenal fans lamina striker ṭha leh hriam an awh êm êm ang kha chu a ni lem lo - tun dinhmunah erawh tlarhma laia khel tur chuan an duhthlan tur neih ṭhat ber a nih a rinawm.

North London club hian season thar khuhhawn nan Pathianni zan hian Community Shield an khel dawn. Season hmasa khan Premier League leh FA Cup-ah Manchester City an champion kawp avangin, league lama pahnihna Gunners nen an inkhel dawn a ni.