City-in Gvardiol an la lut dawn

Manchester City chuan rei tak an hel hnuah Croatia defender Josko Gvardiol an hling fuh ta a, RB Leipzig player hi euro maktaduai 90-in an la lut dawn - club pahnih hi player man chungchangah an inrem tawh.

Kar hmasa lawk kha chuan RB Leipzig hian €100mtd aia tlawma an defender hi an hralh loh tur thu an sawi a, mahse, €90mtd-in an inrem thei ta - Manchester United defender Harry Maguire chu British football transfer-a defender man to ber a la ni rih dawn, tihna a ni.

Maguire manah United hian £80mtd an seng a, Gvardiol-a man hi pound-a chantir chuan £77mtd a ni a, Maguire aiin a man a tlawm zawk - beisei dan chuan tun kartawpah Gvardiol hian medical a nei ang a, City player a nihna angin tlangzarh theih a ni ang.

City manager chhuanvawr Pep Guardiola chuan Gvardiol hi tlarhnung laia a vei lama ding turin a duh nia sawi a ni a, he position-ah hian Ruben Dias, Manuel Akanji leh Nathan Ake te pawh an din theih avangin Aymeric Laporte dinhmun a chiang lo nghala sawi a ni bawk.

Kum 29 mi Laporte hian season hman zawh takah pawh khan inelna hrang hrangah match 24 chauh a khel a, Spain international tan Gvardiol a awm belh tak bawk si avangin chhuah mai chu thutlukna fing tur niin a lang - Arsenal, Tottenham Hotspur leh Crystal Palace te hming lam rik a ni.

City hian nipui transfer-ah Gvardiol hma hian Chelsea midfielder Mateo Kovacic chu £25mtd-in an lo la lut tawh bawk a, transfer dang erawh an la nei lo. Kovacic pawh hi Barcelona zawmtu Ilkay Gundogan hmun ruak luah tura lakluh a ni.

Hetihlai hian winger Riyad Mahrez chuan Saudi Arabia club Al Ahli chu £30mtd-in a zawm bawk a, transfer bazar-ah a lut lam an reh reng hnua Gvardiol an la lut thei tur hi City fan-te chu an lawm khawp ang.

Left back ang pawha chhawr theih Gvardiol hian an ram club Dinamo Zagreb aṭanga a professional zinkawng zawh ṭanin, season hnih a khelh hnuah kum 2021 khan RB Leipzig hi a zawm. Zagreb-ah hian season hnih chhung hi a zawnin league nomawi an chawi a, Leipzig a pan hnuah pawh DFB-Pokal-ah season zawnin an champion.

Kum 21 mi defender hian a professional career-ah season li chiah hun la hmangin, season tin champion nomawi a chawi ziah tihna a ni a, season hmasa lawka treble champion thei City-ah hei hi chhunzawm theih a beisei ang.

Gvardiol hian Leipzig-a season hnih hun a hman chhungin Champions League a khelhpui ve ve a, tuna a zawm tur City hian heng season hnihah te hian an pet chhuak ve ve!

Kum naupang tê ni mah se, Croatia tan match 21 khel tawhin, goal hnih a khung tawh a, World Cup 2022-ah pawh khan ram tan inlanin, pathumna a nihpui a ni.

City hian August 6, zan dar 8:30-ah season thar atana an match hmasa ber an khel tawh dawn a, Arsenal nen Community Shield-ah an intawng ang.