Germany-in World Cup an mangṭha ta

World Cup 2018-ah khan group stage match hnuhnung berah South Korea chuan 2-0 in Germany an hneh a, Kim Young-gwon leh Son Heung-min ten hun pek belhah goal khungin German mipui an vel.

Germany-in South Korea an ngam loh avangin group stage-ah World Cup an mangṭha a, an hliam a dam thei lo - he inkhela chak zawk South Korea pawh an tlang bik chuang lo a, mahse, Germany 'meuh' hneha World Cup an mangṭha avangin fak an hlawh.

Kum 2023 a ni a, tuna an khelh erawh hmeichhe World Cup a ni thung - mahse, thawnthu erawh a danglam lo. German hmeichhiaten an mipa team avanga hmana an thinlung hliam kha tuam dam an tum tehlul nen an thei lo a, South Korea-in World Cup aṭangin an pet chhuak.

Nimin khan South Korea leh Germany hi intawngin, 1-1 in an inhnehtawk a, Morocco-in 1-0 a Colombia an hneh bawk si avangin Germany tan last 16 beiseina a tawp - an ram hmeichhe football chanchina a vawi khat nan World Cup last 16 an khel dawn lo!

Germany an tla

Brisbane khawpuia inkhelah Germany-in chak an mamawh tih an hria a, South Korea pawhin beiseina tlem an neih chhi nung turin chak an mamawh tih an hai lo - goal khung hmasa zawk chu South Korea an ni a, Cho So-hyun chuan minute rukna lekah Germany a barakhaih.

Mahse, Germany hian hnehna chan ngei duhin South Korea an nawr let a, captain Alexandra Popp chuan innghahna tlak a ni, tih pholangin, minute 42-naah si phurh sutna goal a khung a, 1-1 a ni.

Match thum a khelha goal li khungtu Popp hian goal khungna chance dang pawh a nei a, mahse, Wolfsburg striker hian goal-ah a chantir thei lo a, goal hnihna a khung emaw a intih lah video assistant referee rawn a nih hnuah offside vangin pawm a ni lo.

Germany tan substitute Sydney Lohmann pawhin a team chhanhimna hun ṭha nei mah se a chhawr lo a, point khat chiah an hlawhchhuah avangin an tla. Vawi hnih champion tawh Germany zinkawng chu South Korea kutah a tawp a, minute 17 zet hun pek belh pawhin awmzia a nei phak ta chuang lo a ni.

A hunah tak

Group H inkhel dangah Morocco chuan 1-0 in Colombia an hneh a, ram pahnih hi last 16 khel turin an tling ve ve - Colombia tlawm mah se, Morocco an tawn hmaa match hnih an lo chak tawh chu knockout stage luh nan a tawk.

Morocco an vannei - first half hun pek belha captain Ghizlane Chebbak penalty pet chu dan ni mah se a per lehlam hi Anissa Lahmari ke bulah a tla a, French club Guingamp midfielder hian goal-ah a chantir.

Colombia-in a chhanletna an nei lo a, inkhel lehlamah Germany an tlawm bawk avangin Morocco an tlang - match hmasa bera Germany-in 6-0 a an sawp kha chuan beisei a bo tiin a sawi theih a, mahse, a zawna hnehna changin Morocco an tlang ta daih!

Hmeichhe World Cup 2023-ah hian vawi khat nana inlan team pariat an awm a, an zinga team pasarih chu group stage-ah an tla - Morocco erawhin thawnthu ngaihnawm bik ziakin, an vawi khat World Cup khelhnaah round of 16 an lut.