Raducanu a inkhel ve leh ta

A banrek leh a kerek hliam zai a nih avangin Emma Raducanu a inkhel thei lo reng a, tunah chuan British tleirawl hi dam leh tawhin tennis a khel pangngai ve leh thei ta a ni.

Kum 20 mi Raducanu hian Nilaini zan khan social media lamah tennis a khel lai video a dah chhuak. British player Kyle Edmund nen National Tennis Centre, Roehampton-a an inkhel lai a tarlang.

US Open champion hlui Raducanu chuan, "August 2, Nilaini hi a nuamin a hlimawm hle. Tennis court-ah ka lo kir ve leh ta," tiin a ziak a, tun hma lama world number 10 hial lo ni tawh hian ṭha taka lo kir leh ngei a tum.

Kuminah hliam vangin a buai ngun êm êm a, season kal laiah match 10 bak a la khel lo, heng zingah hian vawi nga chiah a chak. Hliam vangin French Open leh Wimbledon a khel thei lo, tunah chuan US Open khelh a beisei ngam tawh ang.

Tennis inelna lian Grand Slam hi season khat chhungin pali khelh a ni ṭhin. Australian Open, French Open leh Wimbledon an khel zo tawh. August 28 aṭang hian New York khawpuiah an khel ṭan dawn a ni.