Season thar khuhhawnna Community Shield: Treble champion Man City hmaah Arsenal

Tunah chuan nghakhlel taka kan nghah vang vang kha a hun a lo thleng leh dawn ta - Premier League season thar a hnai, a khuhhawna atan Pathianni zan dar 8:30 hian FA Community Shield an khel dawn.

Pep Guardiola enkawl Manchester City leh Arsenal te Wembley Stadium-ah an inkhel ang. Citizens hian EPL, FA Cup leh Champions League a la kawp vek a, league lama pahnihna Gunners nen an inkhelh a ngaih phah a ni.

Premier League leh FA Cup champion ten an khelh ṭhin Community Shield hi kum 1908 aṭanga khelh ṭan kha a ni a, vawi 21 champion tawh Manchester United chu team hlawhtling ber an ni, champion lai chu Liverpool an ni thung - kuminah hmel thar kan hmu dawn.

Tunlai City

Pep Guardiola-a'n player chhuak duh a chelh ngai lo, an duh a nih phawt chhuak a chhuahtir hmak hmak zel, an hmunruak luah tur lakluh leh mai pawh a harsat ngai lo, hei hi a kalphung pangngai a ni - captain Ilkay Gundogan pawh a chelh lo.

Mahse, tun hnaiah erawh Spanish manager hian chinfel tur a nei. Defender tawnhriat ngah Kyle Walker chu Bayern Munich nen sawizawm a ni a, a player hman thiamsa hi chelh turin theihtawp an chhuah tur thu a sawi hial.

Gundogan hmunruak luah turin Mateo Kovacic an nei fel tawh, ani hi Premier League hrechiang sa a nih avangin buai lo tura ngaih a ni. Riyad Mahrez thlak tur erawh an la lei lo - Phil Foden a awm avangin an lungngai lo tih a hriat.

Walker bakah hian Bernardo Silva, Joao Cancelo leh Kalvin Phillips te chu bazara thawm nei lai an ni. Cancelo leh Phillips te hian nghawng an nei na hran em em lo ang, mahse Silva erawh midang tana thlak mai theih tur chi a ni lo thung.

Pep-a'n RB Leipzig aṭangin defender Josko Gvardiol a la dawn, ani hi chuan Arsenal a hmachawn hman dawn lo thung. Pound maktaduai 77.6 man tur defender hian hmun pawimawh a chang tura ngaih a ni a, season thar chu City hmel thar kan hmuh a rinawm.

Tunlai Arsenal

Premier League hmahruai rei ber ni chung sia champion lo record an siam a, an sulhnu hnutchhiah hi a chhuanawm loh. Chuvangin Arsenal hian season tawp lama zuih a tum tawh lo, nipui bazarah pound maktaduai 200 bawr vel an hmang der tawh.

West Ham captain Declan Rice, Ajax defender Jurrien Timber leh Chelsea forward Kai Havertz te an lei fel hma. Anni pathum hi pre season an hmannaah an hruai hman vek, coach Arteta-a'n a duh a nih chuan City lakah a chhawr thei ang.

USA-ah season thar inbuatsaihin an zinchhuak a, MLS All-Stars leh Barcelona te hneh mah se Manchester United an hneh lo thung. Arteta chuan an zinna lama an chet danah a lungawi thu a lo sawi tawh.

AS Monaco nen Emirates Cup an khel a, hnehna chang mah se khup hliam vangin Gabriel Jesus a inlan ve thei lo. Khup hliam an zai Jesus hi season thar tir lamah pawh a hmel kan hmu thei dawn lo tih a chiang ta bawk.

Man City lakah pawh Arteta-a'n tlarhma laia ding turin Eddie Nketiah a hman a ngai dawn. Hale End chhuak Nketiah hian Monaco laka goal a khung hnuah inrintawkna a neih san thu a sawi - Citizens tlarhnung lakah fiahna a hmachhawn ang.

Rodri vs Rice

Manchester City hlawhtlin theih nan season hmasa khan Erling Haaland a langsar takzet a, Norway international striker hian inelna hrang hrangah match 52 aṭanga goal 53 a khung theih avangin a hming a langsar hi a mak lo.

Mahse, langsar vut si lo thawhhlawk em em pakhat a awm, a hming chu Rodri a ni. Spanish midfielder hian season tluanin a khel ṭha takzet a, team khaikhawmtu ber tia sawi ngam a ni; tlarhnung leh hma lam a thlunzawm ṭha hle.

Champions League final-ah Rodri hian goal awmchhun a khung a, a phu ang ngeiin UEFA Champions League Player of the Season atan thlan a ni zui bawk. Ani hi tun season atan pawh Man City kulhpui a ni leh ang.

City tana Rodri pawimawhzia hretu Mikel Arteta-a'n Declan Rice an neih theih nan a theihtawp takmeuh a chhuah a, an elpui Man City pawhin West Ham captain hi an chuhpui, a tawpah erawh sum hmang hnem ngam zawk Gunners-in an chang thei ta zawk.

England international midfielder Rice hian Monaco lakah inkhel bul a ṭan thei tawh a, a khel chhe lo. Pound maktaduai 100 chuang man a nih avangin en bik a hlawh dawn, a bik takin tun ṭumah hian Rodri leh Rice te hian khaikhin an hlawh hle ang.

Kan la duhtawk mai lo - Dias

Premier League, Champions League leh FA Cup a ruala lak zet chu a danglam, tun hnaia nomawi chawi ngun tak Manchester City meuh pawh an lawm hle tih a chiang a, an player-te pawhin an hlawhtlinna hi nasa takin an lawm.

Social media lamah Jack Grealishn chu sawi hlawh zinga mi a ni. England international hian nasa takin an champion a lawm, an thlen tur chin thlengin an duhtawk mai ang em tih chu zawhna a ni a, a chhanna chu an la duhtawk mai lo tih a ni.

Man City defender Ruben Dias chuan, "Kan team hian tun hnaiah hlawhtlinna hrang hrang chu kan chang tehmeuh mai, mahse kan la duhtawk chuang lo, nomawi dang chawi chakin kan la tuihal reng.

"A thua sawi ai chua a takin kan lantir leh mai dawn a ni, chuvangin kan match hmasa ber aṭangin hlawhtlinna chan chakin kan tuihal tih in hmu thei ang. Chu chu kei leh ka ṭhiante ngaihdan pawh a ni," tiin a sawi.

Chak vek a pawimawh - Arteta

Arsenal hian Premier League nomawi an chawi lohna a rei tawh, ṭhangkhat lian zet a liam hnuah pawh an la hlawhtling leh thei lo. Club dang ṭantute chuan 'Next Season' an ti fiam ṭhin.

Declan Rice, Kai Havertz leh Jurrien Timber an neih belh avangin an tan tun season thar lo awm tur hi an ram tiam 'Next Season' chu ni tawh turah an ngai, manager Mikel Arteta erawh a la ṭawng fimkhur hle.

Gunners manager Arteta chuan, "Mi ṭhenkhatin nakkum an ti leh tho ang tiin an sawi, hei hi chu Arsenal ang rilru zau kan nih chuan kan pawm thiam tur a ni. A pawimawh zawk chu inkhela hnehna chan a ni zawk.

"Club dangte ang bawkin kan squad tichak thei tur player kan lalut a, inkhel zawng zawngah kan chak vek thei lo a nih pawhin hnehna chan tumin kan khel vek ang," tiin a sawi a, a tir aṭangin theihtawp chhuah an tum ruh hle.