GIG Motors I Day Football: Chhingcows hmaah champion lai Police fiahna

GIG Motors I Day Football-ah champion lai Mizoram Police-in chakin bul an ṭan a, champion rinkai zinga mi Chhinga Veng pawhin chak thoin bul an ṭan. Vawiin chawhnu dar 1:30 hian Lalsangzuala Hmar kaihhruai Chhingcows leh Lalbiaksanga Colney kaihhruai Police te an inkhel dawn a, RG Stadium-a inkhel tur hi a hmuhnawm dawn.

Fiahna patlangtu

Mizoram Police-in match hmasa berah MPL9 champion Chawnpui FC an hneh a, fiahna an patlang. Chutihrualiin Police hi an chak dan thlirlet chuan inchhuang thei an ni lo a, Chawnpui FC hneh tur hian penalty vawi hnih an hmu.

BS-a Colney-in tawnhriat nei player chungah rinna a la nghat a; Malsawmfela, Lalbiakhlua (Biaktea) leh Lalfakzuala te chu tlarhmaah player pawimawh an la ni. Police hian kil tinah player ṭha an la kawl a, goalkeeper F. Lalmuanawma hi tun dinhmuna Mizoram no. 1 a ni.

Defence laiah Lalhmunmawia kawppui turin Shillong Lajong-a inzir tawh K. Lalfakzuala an nei thar a, mual sirah Lalrinzuala Khiangte leh Lalruatpuia te an awm. Mual laiah box to box midfielder ṭha H. Lalbiakthanga leh ball sem thiam bik R. Malsawmtluanga te an awm a, Sawmfela thlawp turin Lalbiakhlua (Hlutea) a awm bawk.

Police XI hian sulhnu an nei ṭha a, zawhna awm erawh an upa deuh tawh em, tih hi a ni. He ngaihdan awm theih chhan chu Chawnpui FC nen an inkhelh ṭum khan inkhelh thunun an harsat a, point thum hlawh chhuak tur khan vanneihna an mamawh tel.

Mahse, Police hian player naupang zawk pawh chhawr tur an nei. F. Lalnuntluanga (Tluangtea) leh F. Lallawmkima (Lawma) te chu tun season atan an la lut thar a, Lalnunsanga (Talea) an nei bawk. Coach BS-a hian nikum aiin kuminah player siksawi tur a nei ṭha a, I Day Football nomawi kawl chhunzawm turin an ṭha tawk.

Sanga hote an ni tlat

Lalsangzuala Hmar-in Chawnpui FC chhuahsanin Chhinga Veng FC-ah a kir a, team ṭha a din nghal. Tualchhung football hrechiang Sanga leh coach Lalremruata te an inkawp a, player an la khawm ṭha dawn tih a chiang. Chutihrualin I Day Football-ah an la kim hman lo a, MPL10 khelh ṭan hunah erawh an kim tawh ang.

Chhingcows hi la kim lo mah se I Day Football nomawi chawi thei zinga mi an ni. Project Veng FC an hneh ṭumin tlarhnung a phui ṭha tawk lo a, keeper RS Lallawmzuala an chhawr theih loh vang a ni thei bawk. Keeper Lawma hi Chanmari FC-in an chhuah fel tawh a, Police hmachhawn turin Chhinga Veng tan a inlan thei ang.

Sanga hian Aizawl FC duh loh MS Dawngliana chu rinrawlah an hmang a, captain armband hreng chungin Dawngtea'n hattrick a siam nghal. Dawngtea thlawp tur hian kum lama naupang zawk leh harh vang rual an awm a, Police tlarhnung tan an hnawksak ang. Chutihrualin match hmasa berah Chhinga Veng tlarhnung a phui lo a, Project Veng lakah goal hnih an chhuah avangin Police laka clean sheet tur chuan an insiamṭhat viau a ngai ang.

Thih leh dam inkara leng Project Veng leh Chawnpui

Vawiin chawhnu dar 1:30 hian RG Stadium-ah MPL kaithar Project Veng FC leh champion lai Chawnpui FC te an inkhel dawn. Club pahnih hi match hmasa bera an chak loh ve ve avangin semifinal luh beiseina nei tur chuan chak a pawimawh ang.

Coach Lalrindika Hmar hnuaia khel Chawnpui hian player an nei chhe lo a, MPL-a champion nawn tumin player an inla khawm. Tlarhmaah pawh David Lalchhuanawma leh K. Lalrosanga te an awm a, captain Vanlalthanga pawh danglamna thlen thei player a ni.

MPL champion lai Chawnpui hian chak ngei tumin ṭan phat aṭangin attacking football an khelh a rinawm a, chutihrualin Project Veng FC hi inveng tawp tur chi an ni lo. Project Veng hian match hmasa berah Chhinga Veng lakah attacking football an khel ngam a, Chawnpui lakah a dawih zawk nih an tum lo ang.

Project Veng hian an match hmasa ber khelh zawhah Kolasib an pan nghal a, vawiin match khel turin nimin khan Aizawl an rawn pan. Inhliam vangin midfielder pahnih Lalropeka leh Jessie Lalmawizuala te an hruai tel lo a, player dang an kim thung.

Kolasib club coach R. Lalruatfela chuan, "Chak tumin theihtawp kan chhuah dawn a, chutihrualin kan hmachhawp chu MPL a ni. I Day Football hi inenchhinna hun a ni ang," tiin Vanglaini a hrilh. Project Veng hian MPL khel tawh chu Melory Laldinsanga chauh an nei a, Kolasib district pawn player panga an kawl mek. Kolasib club tan an dai chin apiang hi thil thar a la ni zel rih a ni.