India U23-ah Terina leh Ayush an ko

AFC Under-23 Asian Cup 2024 qualifier khel tur India Under-23 probable squad puan a ni a, ram tana inlan tura koh chhin zingah Lalrinliana Hnamte leh Ayush Chhetri chu Mizoram player zinga koh an ni.

Dungtlang tlangval, Chanmari chher hriam Terina hian Mohun Bagan Super Giant tan a khel mek a, a professional career-ah season hnih chiah hun la hmang mah se Indian football-ah chuan hriat a hlawh tawh hle.

Terina chuan, "East Bengal-a ka khelh lai khan India Under-21 team-ah khan min koh ve mai ka ring a, mahse, min ko lo. Tun ṭumah hi chuan beiseina pawh ka nei lem lo a, mahse, ka beisei loh lai takin min ko," tiin Vanglaini a hrilh.

Mohun Bagan midfielder Terina hian Calcutta Premier Division leh Durand Cup a khel mek a, July 12 khan Calcutta league-ah hian Tollygunge Agragami hmachhawnin hattrick a siam hial - Ningani zan khan Durand Cup lamah goal a khung bawk.

Terina chuan, "August 12-ah India squad zawm tura tih kan ni a, mahse, club-in AFC Cup leh Durand Cup kan khelh lai a ni dawn a, club hian min chhuahtir ngei ang em, ka sawi ngam lo," a ti.

India tana eng level maha la inlan ngai lo Terina football zinkawng hi a ngaihnawm hle. MFA Grassroots aṭanga bul ṭanin, Chanmari FC Under-18 tan a khelh hnuah Mizo club ruahmannain Pune City academy a zawm a, I League U18 a a inlan hnuah Chanmari-ah bawk a kir.

Terina hian amah siam liantu club tan MFA Super Cup leh Independence Day Cup a khel hman a, Mizoram Premier League-a a inlan hmain kum 2020 khan Hyderabad FC reserves team a zawm.

September 2021 khan Hyderabad hi chhuahsanin, East Bengal a zawm a, Kolkata club tana a season hmasa berah match 17 khel nghalin goal khat a khung a, season hmasa ṭan dawn khan Bagan hi a zawm.

Bagan-a a season hmasa berah Terina hian ISL match 13 khel nghalin, ISL-ah champion nomawi a chawi nghal a, tunah India U23 tana enchhin zingah a tel leh dawn ta. Terina rualin Ayush koh a ni a, ani pawh India tana jersey la ha chhin ngai lo a ni!

Dinthar tlangval Ayush chuan, "Min koh hi chu ka lo beisei ve tho a ni," tiin Vanglaini a hrilh - a awm lo hran lo. Season hman zawh takah khan ISL match 20 a khel kim vek.

Aizawl FC academy aṭanga inzir chhuak Ayush hian Mizo club tan I League a khelh hnuah season hmasa khan FC Goa a zawm a, a season hmasa berah player pawimawh a ni nghal thei.

Ayush chuan, "Pre-season ah ka che ṭha a, coach-ten min duhsak phah a ni. A nihna takah chuan season hmasa bera khati zat match khelh nghal kha ka beisei bik lo," tiin Vanglaini a hrilh.

Blue Tigers hian August 12 aṭangin Bhubaneswar-ah camp an nei ang a, September 6-12 inkar hian Maldives, United Arab Emirates leh China te nen AFC U23 Asian Cup 2024 khelh an inchuh ang.

Qualifier-ah hian team 43 an inel dawn a, group 11-ah ṭhen hran niin, group kuaah team pali zel an awm a, group hnihah team pathum ve ve an awm thung - group tina a tiṭha ber chu Qatar-a neih tur Asian Cup khel turin an tling ang a, pahnihna tiṭha zual pali an tling bawk ang.

India Squad

Goalkeepers: Sachin Suresh, Hrithik Tiwari, Prabhsukhan Singh Gill, Arsh Anwer Shaikh.

Defenders: Narender Gahlot, Hormipam Ruivah, Bikash Yumnam, Halen Nongtdu, Sanjeev Stalin, Sumit Rathi, Jitendra Singh, Abdul Rabeeh.

Midfielders: Thoiba Singh Moirangthem, Lalrinliana Hnamte, Jiteshwor Singh Yumkhaibam, Ayush Dev Chhetri, Vibin Mohanan, Brison Deuben Fernandes, Amarjit Singh Kiyam.

Forwards: Sourav K, Vikram Partap Singh, Parthib Gogoi, Rohit Danu, Ninthoinganba Meetei Khumanthem, Gurkirat Singh, Ayush Chhikara, Sivasakthi Narayanan, Suhail Ahmad Bhat.

Head Coach: Clifford Miranda.