Chelsea-in tlarhnung an thuam ṭha

Nipui bazara player siksawi nasa ber chu Chelsea an ni a, London club hian Monaco defender Axel Disasi chu euro maktaduai 45 (£38.57m) in an la lut. Blues hian Brighton & Hove Albion goalkeeper Robert Sanchez chu pound maktaduai 20 bawr velin an la lut dawn bawk.

Blues tlarhnung

Chelsea hi season liam ta khan Premier League-ah 12-na chauh an ni pha a, a sang 10 zinga an tel phak loh chhan hi goal venhim lam ni loin goal an khung theih loh vangah a ngaih theih.

Blues hian goal 47 an chhuah a, Liverpool nen an goal chhuah zat a inang a, hemi kawng zawnga teh chuan a sang pasarih zingah an tel. Arsenal leh Manchester United aiin goal li chauhin an chhuah tam bawk.

Mahse, Chelsea defender Wesley Fofana a inhliam avangin a thlakna tur player an mamawh a, Monaco aṭanga an lakluh thar Disasi hian season liam ta khan Ligue 1 match 38 a khel vek.

France tan kum 25 mi Disasi hi vawi li chauh la inlan mah se World Cup final-a Argentina an hneh loh ṭum khan bench aṭangin a lut. Disasi chuan, "Hlawhtlinna chan tumin Stamford Bridge ka pan a, nomawi chawi ngei ka duh," tiin a sawi.

London club hian season liam ta khan rinrawlah goalkeeper Kepa Arrizabalaga an hmang a, UCL nomawi chawipuitu keeper Édouard Mendy chuan Al-Ahli a pan tawh. Kepa elpui tur hian kum 25 mi Sanchez chu Brighton aṭangin an la lut dawn a, a man pawh pound maktaduai 25 vel a ni.

Season liam ta khan Sanchez hian Jason Steele lakah position a hloh a, chutihrualin Spanish keeper hi ke hmang thiam a nih tho avangin Kepa tan no. 1 nih chhunzawm a har ang.

Chelsea hian season liam ta khan Brighton defender Marc Cucurella chu pound maktaduai 60 bawr velin an la lut tawh a, manager Graham Potter pawh an chhuhsak. Blues hian Seagulls hi bazar nan ber an hmang a ni ber a, chutihrualin midfielder Moises Caicedo lak tumin vawi tam dawr mah se pound maktaduai 80 meuha an dilna pawh hnawl a ni thung.

Sum ngah Blues

Chelsea hian tun nipui bazarah player panga lakluh nan pound maktaduai 125 vel an hmang tawh a, Robert Sanchez an lak hunah phei chuan pound maktaduai 150 velah a kai chho ang.

Mahse maw, Chelsea hian player ṭhahnem tak an chhuahtir. Kai Havertz, Mason Mount, Mateo Kovacic, Christian Pulisic, Kalidou Koulibaly, Edouard Mendy, Ruben Loftus-Cheek leh Ethan Ampadu te an hralhna aṭangin pound maktaduai 220 vel an hmu thung a, pound maktaduai 100 dawn an la hlep pha.

Chutihrualin Chelsea squad erawh a chhah ṭha a, Mauricio Pochettino pawhin a duh aia an tam thu a zep lo. Hei vang hian London club hian player ṭhenkhat chhuahtir hi a duhthusam a ni dawn a, hming langsar Romelu Lukaku te hi an hlawh a tam avangin hnawksak an ni thei bawk.