Australian Open quarter final-ah PV Sindhu a chak lo

Olympic medal vawi hnih dawng tawh PV Sindhu chu Australian Open quarterfinal-ah a tla. Indian nula hian world number 12 Beiwen Zhang chu straight game hmangin a ngam lo.

Nimina quarterfinal inkhelah USA player Zhang hian Sindhu hi minute 39 chhungin 12-21, 17-21 in a hneh a, tun season kal laiah result a neih chhiat em avangin Sindhu hi ranking lamah pawh 17-naah a tlahniam tawh a ni.

Tun hma chuan an intawn tawhna vawi 10-ah Sindhu hi vawi ruk a chak, mahse tun ṭumah chuan China rama piang, mahse American khua leh tui nihna nei Zhang lakah hian inkhel a thunun thei tlat lo.

World Championship 2019 champion Sindhu hian hliam na tak a neih hnuah ngai a la awh leh thei lo, tun season chhungin BWF World Tour 12 an khelh tawh ho zinga pasarihah chuan hma takah a tla vek.

Korean coach Park Tae-Sang nen an thawhdunna a tawp tawh a, tunah hian coach thar Muhammad Hafiz Hashim leh SAI coach Vidhi Chaudhary te nen an thawk ho leh mek a, hmasawn zawnga kal an tum ang.

August 21-27 chhung hian World Championship chu Copenhagen, Denmark-ah khelh a ni leh dawn, inelna lian atana inbuatsaih turin Sindhu hian chawlhkar hnih hun a la nei tihna a ni.