Indian football season an ṭan - a bul ṭanna Durand Cup

Football season chawlh a ni a, European football mai ni loin Indian football thlengin a reh ṭhuap - Premier League ṭan a hnai a, Indian football pawhin thawm a nei ve leh ta.

Indian Super League leh I League ṭan hmaa inelna ngaihhlut hlawh Durand Cup chu Ningani zan khan khelh ṭan a ni leh ta a, match hmasa berah Mohun Bagan Super Giant chuan Bangladesh Army chu 5-0 in an sawp.

Bagan tan Lalrinliana Hnamte hming lam nawn a ngai a, Mizo tlangval hi Kolkata club tana goal khungtu zingah a tel - Terina bakah hian Liston Colaco, Manvir Singh (penalty), Suhail Bhat, Lalrinliana Hnamte leh Kiyan Nassiri te chuan goal khat ṭheuh an khung.

Nizan khan ISL club Northeast United FC leh Shillong Lajong te an intawng ve leh a, he thu buatsaih a nih lai hian an result kan hre hman lo.

A hming Terina

Calcutta Premier Division lamah Terina hmingin lam rik a hlawh a, Durand Cup lamah pawh Mizo tlangval chanchin an sawi chhunzawm zel - hello, Indian football, in lo thlir maw?

Terina hian goal khat a khung mai bakah penalty a hlawh chhuak bawk a, striker tawnhriat nei ṭha Manvir chuan harsatna nei loin goal-ah a chantir - Terina penalty hlawhchhuah hmangin Bagan-in 2-0 in hma an hruai.

Bagan tan hian khel ṭha em em mai Liston Colaco chuan goal hmahruai a khung a, Manvir leh Suhail ten belhchhahin chawlhlawk hman a ni - second half-ah Terina inlar ve lehin a khung belh a, Nassiri chuan minute 89-naah a belhchhah.

Bangladesh sipai team footballer Mijanur Rahman chu first half hun pek belhah hnawhchuah a ni a, Bagan-in game an thunun sa piahlamah a tam zawk an nih chu an chhawr ṭangkai tiin a sawi theih.

Tute nge tel?

Durand Cup hi ISL club tam zawkin an team enchhin nan an hmang ṭhin a, a awm lo hran lo - tun ṭumah pawh hian ISL club 12 an inlan kim vek a, I League club panga an inlan bawk.

I League second division club Downtown Heroes leh Assam aṭangin Bodoland FC te chuan inelna an hmachhawn bawk a, Indian Armed Force team aṭangin Indian Air Force, Army Red leh Indian Navy an inlan.

Ram pawn lam armed force team aṭangin Bangladesh Army leh Nepal Army Club - Tribhuvan Army tia hriat lar chu an inlan bawk a, kum 27 hnua Durand Cup-a ram pawn team an inlan leh hmasak ber a ni.

Team 24-te hi group parukah, team pali zel awma ṭhen hran an ni. Group tina a sang ber leh pahnihna tiṭha zual pahnihte chuan quarterfinal an lut nghal ang - inelna hi Kolkata, Guwahati leh Kokrajhar-ah te khelh a ni dawn a ni.

A chhehvel

Durand Cup hi Durand Football Tournament Society-in All India Football Federation thlawpnaa a buatsaih a ni a, AIFF bakah hian Indian Armed Forces (Eastern Command), West Bengal sorkar leh Assam sorkar te an inrawlh bawk.

September 3 thlenga neih tur inelnaah hian lawmman atan cheng nuai 89 sem ral a ni dawn a, champion team chuan cheng nuai 50 an dawng ang a, pahnihnain nuai 30 an dawng dawn bawk.

Mimal lawmman sem chhuah a ni dawn a, goalkeeper ṭha ber (Golden Glove), goal khung tam ber (Golden Boot) leh player khel ṭha ber (Golden Ball) tan lawmman sem a ni dawn a, heng mimal chawimawina dawngtute hian nuai thum ṭheuh an dawng dawn a ni.

Vawiinah inkhel pahnih a awm dawn a, tlai dar 4:45-ah ISL club Mumbai City inlanin, Mohammedan SC an hmachhawn dawn a, Pathianniah ISL club pahnih Hyderabad FC leh East Bengal an inlan ve leh bawk ang.