Hmeichhe World Cup - vawiinah round of 16

FIFA Women's World Cup 2023 knockout round chu vawiin aṭangin khelh ṭan a ni dawn a, match hmasa berah Switzerland chuan vawiin chawhma dar 10:30 hian Spain an hmachhawn dawn.

Switzerland-in World Cup-ah sulhnu ropui sawi tur an nei lo a, tun hi World Cup an khelh vawi hnihna chauh a la ni - kum 2015 khan a vawi khat nan khelin, round of 16 tho an lut a, record thar duhawm zawk siam an duh ang.

Group A-ah Switzerland hi hmahruaitu an ni a, mahse, goal khungna match khat chiah an nei - Philippines chu 2-0 in an hneh a, a hnuah Norway leh New Zealand chu goal khung loa inhnehtawkpuiin last 16 an lut daih!

Switzerland tan Spain hneh turin Ana Maria Crnogorčević a ṭangkai dawn a, Barcelona winger hian ram tan match 147-ah goal 71 a khung tawh a, Spain club tana khel a nih avangin an hmachhawn tur team hi hrechiang tura ngaih a ni bawk.

Spain hi hmeichhe football lamah chuan an ropui lua bik lo - World Cup an khelh vawi thumna niin, round of 16 aia sang an la thleng ngai lo. Thawnthu her danglam turin chak an mamawh - mahse, he team hian Costa Rica (3-0) leh Zambia (5-0) sawp mah se, Japan (4-0) lakah an mualpho a, insiamṭhat an mamawh.

Japan-in group stage match thumah goal 11 ngawt khungin an lamah goal a lut miah lo a, vawiin dar 1:30 hian Norway an hmachhawn dawn - a hmuhnawm ang. Kum 2011 champion Japan tan goal li khung tawh Hinata Miyazawa chu player langsar a ni a, world champion vawi khat ni tawh Norway laka an khelh dan tur en a châkawm.

Pathianni zing dar 7:30-ah Netherlands leh South Africa an intawng dawn a, Dutch team hi kum 2019 finalist niin, nomawi nena haw ngei an duh tawh dawn a, a vawi hnih nana World Cup khel ve chauh South Africa lakah harsatna tawng lo tura ngaih an ni.

Chawhnu dar 2:30-a Sweden leh USA inkhel tur mawlh hi en a châkawm - Sweden hian group stage match thumah hnehna chang vek tawhin, world champion la ni chiah lo mah se vawi thum ngawt pathumna an ni a, kum 2003 final-ah khan USA an ngam lo bawk.

US erawh vawi li champion tawh niin, champion ngun ber an ni a, a zawna vawi hnih champion lai an ni. Mahse, tun inelnaah beisei an phak lo a, match thum aṭanga point nga hmuin last 16 an lut hram - Sweden hian 1999 quarterfinal leh 2003 final-a an ngam loh USA laka phuba lak an châk dawn.