Pathianni zanah British Grand Prix

Bike intlansiakna sang MotoGP chu season chawhnu lam an hmang ṭan dawn, nipui chawlh an hman hnuin Pathianni tlai dar 5:30 aṭangin inelna an nei chhunzawm leh dawn. Silverstone tlankawngah British Grand Prix an tlan ang.

Tun season intlansiak vawi riat an neih tawh chinah Francesco Bagnaia chuan point 194 neiin a hmu tam ber, Ducati rider hnungah hian Jorge Martin (159 points) leh Marco Bezzecchi (158) te an awm.

Rider champion tum inum zingah tel phak lo mah se Marc Marquez chu chanchin ngah leh sawi hlawh a ni. Repsol Honda rider hian hliam na tak a tawrh hnuah ngai a la awh leh thei lo, season chawhnu lamah insiamṭhat a tum.

Vawi ruk champion tawh Marquez chuan, "Ka banrek leh kerek dinglam ve ve hi a nih tur ang takin a la ni lo deuh. Silverstone tlankawngah chuan engkim a fuh vek tawh ka beisei," tiin a sawi.