Hojlund kan nghahna a rei tawh - Ten Hag

Manchester United chuan pound maktaduai 73-in Rasmus Hojlund chu Atalanta aṭangin an la lut fel a, Inrinni tlai khan Old Trafford-ah an pho chhuak. Erik ten Hag-a hote hian friendy match-ah season liam ta Ligue 1 pahnihna RC Lens an hmachhawn a, 3-1 in an hneh.

Inkhelh ṭan hmain Hojlund hi phochhuah a ni a, Man United manager Erik Ten Hag-a'n player thar chungah beisei a nei sang hle. Dutch manager chuan, "Tlarhmaa awm tur dik tak a ni a, goal khung tum tlat mi a ni. Theihna sang tak a nei a, a theihna ang hai chhuah hi a mawhphurhna a ni. Kei, coach leh a khelhpuiten a theihna anga a khelh chhuah theih nan kan pui ang," tiin a sawi.

Man United hian season liam ta khan Cristiano Ronaldo hoin bul an ṭan a, Portuguese forward hian league match 10-ah goal khat chauh a khung hman. Ronaldo aiawhtu Marcus Rashford-a'n match 35 aṭangin goal 17 a khung a, chutihrualin English striker hian chet ṭhat loh lai a neih bakah number 9 a nih lohna chin a awm.

January thlaa lakluh Wout Weghorst-a'n league match 17 lai khel hman mah se goal a khung lo. Inhliam vangin Anthony Martial a buai reng a, French forward hian match 21 aṭangin goal ruk chauh a nei bawk.

Man United manager Ten Hag chuan, "Hojlund ang player hi kan nghahna a rei tawh a, dressing room leh khelmualah kan ṭangkaipui dawn. Goal khung tuma tuihal kan duh a, goal hi chakna leh nomawi chawina a ni," tiin player thar a fak.

Kum 20 mi Hojlund hian kum nga daih contract a ziak. Season liam ta khan Hojlund hian Serie A match 34 aṭangin goal 10 a khung a, Red Devils tana Hojlund hlutna chu naupan lai aṭanga Man United ṭantu a nihna hi a ni.

Hojlund chuan, "He club ropui tak ṭantu ka nihna hi zep tur a awm lo a, naupan lai ṭanga ṭantu ka ni. Manchester United player ni chunga Old Trafford-a chhuah hi ka suangtuah ṭhin," tiin a sawi. Nizan khan Man United hian friendly match-ah Atheltic Bilbao nen friendly match an khel lehnghal a, player thar Danish striker hi squad-ah a tel lo.

Manchester United hian August 14, Thawhṭanni zan dar 12:30-ah Wolves an mikhual dawn a, Hojlund hi inlan dawn em tih chu hunin a la hril ang. Ten Hag-a hote hian friendly match vawi thum a zawna an tlawm hnuah Old Trafford-ah hnehna an chang.

Lens lakah hian keeper Andre Onana chu minute 23-na lekah Florian Sotoca-a'n hla tak aṭangin a pet khum. David de Gea thlaktu Onana hi sawisel mah se goal luhnaah erawh dem ngawt theih a ni lo a, Diogo Dalot pass sual vanga thleng a ni zawk.

Player thar Mason Mount pawh a chesual a, hnai tak aṭangin goal ruakah a pet ṭhelh. Chutihrualin Man United hi minute 90 chhung an khel ṭha a; Marcus Rashford, Antony leh Casemiro te goal hmangin hnehna an chang.