Mexico Open champion Tsitsipas

Tennis inelna ATP Mexico Open chu nimin zing khan khelh zawh a ni a, seeded pakhatna Stefanos Tsitsipas chuan a khingpui Alex de Minaur chu 6-3, 6-4 a hnehin a champion.

Tsitsipas hi player ṭha tak a ni a, nomawi pawh a chawi hnem tawh. Mahse, tun hnaiah erawh a vannei tawk lo, kumin chhung pawhin Australian Open leh Barcelona Open final lut mah se Novak Djokovic leh Carlos Alcaraz te a ngam lo.

Greek tlangval hi a beidawng duh lo, tunah chuan kum khat leh thla hnih hnua a vawi khat nan champion nomawi a chawi ve leh ta a ni. Mallorca Open hnua a title lak leh hmasak a ni a, hemi inkar hian final vawi nga lut mah se a chak lo zawkah a ṭang vek a ni.

Kum 24 mi Tsitsipas chuan, "Inkhel ropui tak a ni, ka tan phei chuan tournament chhinchhiah tlak leh hlu tak a ni chiang hle. A nihna takah chuan nikum tawp lam leh kumin tir lam kha chu a harsa pawh ka ti ve ṭhin hle.

"Beiseina sang tak nei ve ṭhin mah ila a tawpah a vanduai zawk ka ni leh mai ṭhin, tun ṭumah erawh a tir aṭanga a tawp thlengin hlauhthawnna tur ka nei lo," tiin a hlim thu a sawi.

Nomawi inchuhna inkhelah hian a tir aṭangin match a thunun hneh hle a, harsa lo takin set khatna a la; set hnihnaah pawh a khingpuiin double fault a neih avangin a service a chhuhsak zui leh a, a tawp thlengin a dingchang.

Tun hma angin a service ṭha tak a nei leh thei tawh, a service hmasa 28 zinga 23 tehmeuh a tidik thei a, darkar khat leh minute 36 an inkhelh chhungin a khingpui service vawi li ngawt a chhuhsak thei bawk.

August thla tawp lam aṭangin US Open an khel leh dawn. Tsitsipas tan chuan hard court inelna lian hmachhawn a châkawm ta sawt a, tun hma lama a la tih theih ngai loh Grand Slam title hmasa ber lak tumin New York khawpui a pan thei dawn a ni.