City defender thar Gvardiol

Treble champion Manchester City chuan Croatia centre back Josko Gvardiol chu RB Leipzig aṭangin an la lut chiang ta a, a man atan euro maktaduai 90 (£77mtd) sengin, kum nga chhung atan contract an ziahpui.

Gvardiol hi football khawvela defender man to pahnihna a ni nghal a, a chungah hian Manchester United defender Harry Maguire a awm - England international hian kum 2019 khan Leicester City aṭangin United a pan a, a man hi £80mtd niin khum thei an la awm lo.

Kum 21 mi Gvardiol chuan, "England-a inkhelh hi chu ka lo mangphan fo tawh ṭhin a ni a, ka beiseite tihlawhtling tura season hmasa lawka hlawhtling êm êm Manchester City ka zawm thei hi ka tan chuan chawimawina a ni," a ti.

Croatia tana vawi 21 inlan tawh Gvardiol hian World Cup 2022-ah khan an ram team chu pathumna a nihpui a, kumin Nations League-ah pahnihna an ni bawk - a kum naupan ngaihtuahin tawnhriat a nei ṭha hle.

City tana jersey number 24 ha tur Gvardiol chuan, "Season hmasaa City inkhel entute chuan khawvela team ṭha ber an ni, tih an pawm vek. Treble champion an nih khan he team nihna tak chu a pholang chiang hlein ka hria," a ti.

Premier League, FA Cup leh Champions League-a City champion puitu coach Pep Guardiola chuan Gvardiol hi tlarhnung laia a vei lama ding turin a duh nia sawi a ni a, he position-ah hian Ruben Dias, Manuel Akanji leh Nathan Ake te pawh an din theih avangin Aymeric Laporte dinhmun a chiang lo thung.

Gvardiol chuan, "City ka zawm thei hi kei leh ka chhungte tan chuan a hlu takzet. Pep nena kan thawkdun thei tur hi ka tan chuan thil ropui a ni a, ka zinkawng ka zawh ṭan dawn chauh avangin football coach ṭha ber hnuaiah hma ka sawn ngei ka beisei," a ti.

City hian nipui transfer-ah Gvardiol hma hian Chelsea midfielder Mateo Kovacic chu £25mtd-in an lo la lut tawh bawk a, tun nipuiah player pahnih chiah la la lutin, Croatian player ve ve an ni!

Gvardiol chuan, "Croatia midfielder Mateo Kovacic nena kan khel dun thei tur pawh hian min tiphur hle," a ti a, City striker chhuanvawr Erling Haaland hmachhawntu ni loa khelhpuitu a ni thei tur chu a lawm thu a sawi bawk.

Croatian defender chuan, "Vanneithlak takin kan khel dun tawh dawn a, ka ven a ngai tawh dawn lo," a ti - City defender thar hian RB Leipzig-a season hnih hun a hman chhungin Champions League a khelhpui ve ve a, City an tawng ve ve.

Left back ang pawha chhawr theih Gvardiol hian an ram club Dinamo Zagreb aṭanga a professional zinkawng zawh ṭanin, season hnih chhung a zawnin league-ah nomawi a chawi a, kum 2021 khan Leipzig zawmin, DFB-Pokal-ah season zawnin an champion.

City director of football Txiki Begiristain chuan, "Uluk taka kan thlithlai reng player a ni a, theihna sang tak a neiah kan ngai a ni. European football-a club lian zawng zawngin an enthla vek a, kan chang thei hi kan vannei hle.

"Josko hian centre back-in nei tura kan duh ang chu a nei vek. A che rang a, tharum a ngah a, inel nuam a ti a, boruakah a chak a, ball a keng thei a, a inringtawk a, mize ṭha tak a ni bawk. A ke vei lam a hmang a, hei hi kan chhawr theih tur a ni," a ti.

Gvardiol hian 2021-22 season khan Europa League semifinal-ah Leipzig a hruai thleng bawk a, he season-ah hian City-te nen Champions League group stage-ah awm hoin, group-ah pathumna an ni a, season hmasa khan last 16-ah intawngin, an home-ah 1-1 in chelh mah se, Etihad Stadium-ah 7-0 in an tlawm.

Croatia international chuan, "Season hmasaa City kha chu team zawng zawngin hmachhawn loh an duh vek. Kan intum hma khan a harsa dawn tih ka hre sa vek a, mahni khelmuala an khelh dan kha a awihawm loh zawk a ni. Ball an kenin an hahdam a, level hran daih an ni," a ti.

City hian tun nipuiah player pahnih la lut tawhin captain Ilkay Gundogan chuan Barcelona a zawm thung a, winger Riyad Mahrez chuan Saudi Arabia club Al Ahli chu £30mtd-in a zawm bawk. Nizan khan Arsenal nen Community Shield an khel a, result kan hre hman lo.