MBA Official Junior Championship 2023 : Ṭhazuala bawk a ropui leh ta!

Mizoram Badminton Association Official Junior Championship 2023 chu Inrinni khan neih zawh a ni ta a, senior inelnaa Men's singles champion ni zo hlim Lalṭhazuala bawk a langsar nawn.

Mission Veng Indoor Stadium-a neih inelnaah hian Ṭhazuala hian Under 17 leh Under 19 inelnaah champion nomawi a chawi a, senior leh junior-ah ro a rel ve ve. August 1 aṭanga neih ṭan inelnaah category hrang hrang 14-ah inelna neih niin, players 182-in inelna an hmachhawn a, category hrang hrangah hian entry 245 lutin match 216 lai khelh a ni.

MBA Junior inelna hi Mission Veng Badminton Academy leh Mizoram Badminton Association ṭangkawpin an buatsaih niin, Mizoram State Sports Council ṭanpuinaa neih a ni a, kum dik taka inelna neih a nih theih nan player-te chu birth certificate leh aadhaar card original kentir niin, an khelh dawn apiangin endikna neih zel a ni - an fimkhur hle.

A hming Ṭhazuala

Kar hmasa lawkah Mizoram-a Men’s singles inelnaah Ṭhazuala a champion a, kum 16 leh ni nga mi niin, champion thei naupang ber record a siam - Chanmari West rawlthar hian junior inelna lamah pawh a ro a rel chhunzawm a, Mizoram badminton roreltu, tiin a sawi theih.

Ralte Villa BC tana inlan Ṭhazuala hian Under 17 Boy’s singles final-ah Ralte Villa tan thoa khel, Durtlang rawlthar C. Lalramsanga chu 21-15, 21-17 a hnehin a champion a, U19 Boy's singles-ah pawh tun inelnaa khel ṭha tak, Ramhlun Venglai rawlthar Sainunmawia Sailo (Bawngkawn BC) chu 21-12, 21-19 in a hneh.

Ṭhazuala bakah hian final-a a hneh tak pahnih C. Lalramsanga leh Sainunmawia Sailo te hi Tata Trust (NEIDA) hmalaknaa Pullela Gopichand Badminton Academy (PGBA), Hyderabad-a inzir mek an ni a, nimin khan academy lam panin Aizawl an chhuahsan lehnghal.

Mama & Rinhlui

MBA dan angin mi pakhat tan tournament pakhata category pathum chinah a tel theih a, Chanmari West naupang H. Lalrinhlui leh Serchhip naupang Malsawmhlua te chuan U15 an la khelh theih avangin category pathumah inelna an hmachhawn - an telna category pathumah hian final an lut vek bawk!

Ralte Villa tana khel Rinhlui hian singles inelna pathum U15 Girl’s singles, U17 Girl’s singles leh U19 Girl’s singles-ah te inelna hmachhawnin, final a thleng vek a, U15-ah champion nomawi chawiin, U17 & U19-ah erawh uiawm taka deciding game-a chak lo ve vein silver-ah lungawi a zir.

Malsawmhlua'n Ralte Villa hming tiṭha ve lehin, Mama tia koh kum 14 mi hian U15 Boy’s singles leh U15 Boy’s doubles-ah champion nomawi chawiin, U19 Boy’s doubles-ah erawh nomawi a chawi phak ta lo.

Result dang

Mizoram badminton sawi rik a nih chuan Abigail Lalṭhazuali hming lam rik zel a ngai tawh a, U19 Girl’s singles final inkhel hmuhnawm takah Saron Veng BC tana inlan Abigail hian Rinhlui chu deciding game-ah 21-15, 18-21, 21-16 in a hneh a ni. Player pahnih an inhnehtawk viau a, a tawpah tawnhriat nei ṭha zawk Abigail a chungnung ta a ni.

Under 17 Girl’s singles inelnaah pawh Rinhlui leh Mission Veng Badminton Academy chhul chhuak Lalrinkimi ten final hmuhnawm tak an khel a, a vanduai zawkah Rinhlui a ṭang nawn - deciding game-ah tho Rinkimi hian hnehna changin, 13-21, 21-10, 22-20 in a champion a ni.

Hetihlai hian Under-13 Boy’s singles inelnaah hmabak nei êng tak Zothankima, Durtlang Leitan BC chuan 21-11, 21-13 a Abraham Lalnunthara, Ralte Villa BC hnehin a champion bawk.

A chhehvel

Ṭum dangah chuan MBA Junior Official Championship leh Senior Official Championship-te chu a a ruala neih ṭhin a ni a, mahse, kuminah erawh inelna hmachhawn thei an tam piah lamah, senior leh junior khelh kawp a hautak ṭhin avangin a ruala neih a ni - junior inelna hi entu an ṭhahnem ṭhin hle.

Mizoram badminton legend Lalmuanawma chuan hmasawnna hmuh tur a awm thu sawiin, "Power game an nei tawh a, an kutthlak pawh a na tawhin game speed pawh a ṭha tawh hlawm khawp mai," a ti a, PGBA coach, tuna RDC, Aizawl enkawltu, Eddie Lalfemkima chuan, “Kan Mizo naupangte badminton game a hmuhnawmin, an shuttlecock control pawh a dik hlawm tawh hle. Court chhunga an che velah pawh hmasawnna hmuh tur a awm. Mizo in kan mamawh êm êm, power smash-ah nasa lehzual ṭan lak erawh a ngai," a ti.

Tata Trust (NEIDA) leh MBA thawhhona avangin Mizoram badminton-ah hmasawnna hmuh tur a awm zel a, Mizo naupang tam takin phai lam academy-ah hmun chang chho ṭanin, badminton-in Mizoram a run mek e.