GIG Motors I Day Football 2023-ah tla leh tling an la awm lo: Police ngamtu Chhinga Veng

Chhinga Vengin August 5, Inrinni khan I Day Football champion lai Mizoram Police 5-4 in an hneh a, chakna goal hi MS Dawngliana'n injury time-ah a khung. RG Stadium-a inkhelah hian goal kua zet a lut a, inkhel hmuhnawm bik niin tualchhung football-a inkhel 'class' zinga mi a ni.

Chhingcows hian hnehna an chan avangin semifinal lut turin an dinhmun a ṭha a, amaherawhchu beisei nei Chawnpui FC an la hmachhawn dawn avangin tla thei an la ni. Mizoram Police-in Project Veng FC an hmachhawn dawn a, Chhingcows leh Chawnpui aia an khelh hmasak zawk dawn avangin match hnuhnung ber hi a harsa sawt ang.

Goal leh hmuhnawm

Inkhel an ṭan chauh a, Chhingcows-in Police tlarhnung mawi zetin an ṭhiat nghal. Isak Malsawmkima'n goal hmahruai a khung a, Serchhip tlangval Johny Lalremruata pawhin danglam zetin a khung zui bawk.

Minute 10 pawh tling loah goal hnih a lut tawh a, Chhinga Veng an chak awlsam dawn niin ngaih theih mah se an khingpui hi Police an ni tlat. Minute 14-na lekah vei lam aṭanga Malsawmfela cross chu Lalbiakhlua'n (Hlutea) a tauh lut a, Chhingcows tlarhnung an buai zui.

Malsawmfela class sanzia a lang chhunzawm thung. Sawmfela leh Lalfakzuala ten Chhingcows tlarhnung chu wall pass hmangin an ṭhiat a, Police captain Fakzuala hian minute 30-naah goal kilah tak a dah. Minute 44-naah Police-in ball an hloh ho a, Chhinga Veng captain Dawngtea through ball pek chu Suanngaihmuana'n um lutin keeper a paltlang hnuah awlsam takin a khung. Tualchhung football ngainate tan Amuana hming chhinchhiah hi a ṭha ang.

A la ngai tho

Second half pawh first half ang tho a la ni a, goal a luh bakah a hmuhnawm tel zel. Police defender Lalhmunmawia'n Amuana lakah penalty a chawi a, Dawngtea'n minute 52-naah a khung. Chhinga Vengin 4-2 in hma an hruai a, minute nga hnuah Police-in an sut zo vek!

Minute 55-naah Police-in handball vangin penalty an hmu a, Hlutea'n a pet goal. Minute hnih hnuah Sawmfela ball fing chu Biaktea'n um lutin Fakzuala'n siphurh sutna goal a khung. Tawnhriat nei player pathum ball inpe kual hi a mawi hle.

A khat tawkin chance an inneih chhawk a, goal erawh hmuh tur a awm lawk lo. Minute 89-naah Ahmuntea'n Chhingcows defender Abela lakah penalty a chawi a, Dawngtea rawn pen chhuakin R. Malsawmkima'n (Mana) a dansak. F. Lalmuanawma inhliam vanga lut Man-a 'hero' hman viau mah se hun a la tawp lo.

Injury time-ah Chhingcows substitute Isac Zomuanpuia'n freekick ṭha zetin a pet a, Dawngtea'n a tihsual siam ṭhat nan hmangin a lu hmangin chakna goal a tauh lut. Sanga Hmar hote 5-4 in an chak a, point thum hlu zet an hlawh chhuak.

Vannei = Chawnpui, Vanduai = Project Veng

GIG Motors I Day Football 2023-ah Chawnpui FC-in injury time-a substitute Peter Lalrinhlua goal hmangin MPL kai thar Project Veng FC 1-0 in an hneh. First match-a vanduai vanga chak lo Lalrindika Hmar hote an vannei ve ta a, Project Veng erawh an la vanduai chhunzawm zel.

Chutihrualin Project Veng FC tan semifinal kawng a la inhawng a, match hnuhnung bera Mizoram Police an hneh dan a zirin knockout stage an lut thei. Tun ṭum inelnaah hian MPL club pariat chu group pahnihah ṭhen an ni a, tla an la awm loh bakah semifinal tling tawh pawh an la awm lo.

Chawnpui FC hi MPL champion lai an ni a, I Day Football nomawi chawi an duh. Lalrindika Hmar hote hian match hmasa berah Police an hmachhawn a, an khel ṭha zawk nachungin a vanduai zawkah an ṭang.

Project Veng FC lakah Chawnpui hi chak tura ngaih ni sa mah se Kolasib club hian MPL champion hi an hlau lo. Chhinga Veng an hmachhawn ṭum ang thoin Project Vengin game pangngai an khel a, goal venhim hna thawh an tum lo.

Kolasib club hian first half-ah pawh chance ṭha an ngah zawk a, penalty shout pawh nei mah se pek an ni lo. Hortoki khua Lalnuntluanga'n (Nununa) crossbar a pet per a, captain Andy Lalrinpuia freekick pet pawh Chawnpui keeper John Lalruatfela'n ṭha zetin a dang.

Project Veng FC attacker MS Dawngzuala leh Lalfamkima ten Chawnpui tlarhnung tan hna an siamsak nasa a, mahse an duh ber goal an khung thei lo. Head coach R. Lalrammawia (Patea) leh assistant coach R. Lalruatfela te hnathawh a lang a, football hmuhnawm an khel.

Mahse, a tawpah erawh tawnhriat player ngah zawk Chawnpui danglamna a lang. Injury time-ah substitute Peter-a'n ṭha zetin ball a la lut a, Malsawmzela (Valpuia) nen wall pass hmangin Project Veng tlarhnung an ṭhiat a, Peter-a hian chiang zetin chakna goal a khung.