Chelsea keeper thar Sanchez

Team indin thar tum mek Chelsea chuan Robert Sanchez chu Brighton & Hove Albion aṭangin an la lut. Spanish goalkeeper Sanchez hi pound maktaduai 25 man niin Stamford Bridge-ah kum sarih cham turin contract a ziak.

Season hmasa khan Sanchez hian Brighton tan Premier League match 23 a khel, mahse, a hnu lamah Jason Steele a tluk loh tak avangin bul a ṭan lo zauh zauh, tunah chuan Blues tana khelh phak a tum ang.

Chelsea keeper Edouard Mendy chuan June thla khan Saudi Pro League club Al-Ahli a zawm tawh a, tunah hian Kepa Arrizabalaga an la nei. Kepa leh amah ang bawka Spanish player tho Sanchez te hian Mauricio Pochettino lung tiawitu zawk nih an tum dawn.

Sanchez hian kum 15 mi chauh a nih laiin La Liga club Levante aṭangin Brighton a zawm, intuaihriam turin Forest Green Rovers leh Rochdale lama hun a hman hnuin kum 2020 November thla aṭang khan a club tan hian EPL a khel ṭan.

Brighton coach Roberto de Zerbi chuan, "Robert hi player ṭha tak a ni satliah lo a, mi fel leh ṭha tak a ni tel bawk. A chang chuan thutlukna harsa tak tak siam a ngaih chang a awm, tun ṭum ami pawh hi a harsa khawp mai," a ti a, hmasawn zel turin duhsakna a hlan bawk.

Blues hian tun nipui chhungin Christopher Nkunku, Nicolas Jackson, Axel Disasi leh Lesley Ugochukwu te bakah Angelo Gabriel te an la lut tawh a, keeper Sanchez an lakna Brighton aṭangin midfielder Moises Caicedo an la beisei mek bawk a ni.

Chelsea sporting director Paul Winstanley leh Laurence Stewart te chuan thuchhuah siamin, "Robert hian Premier League-ah a theihna a pholang tawh a, hei mai bakah hian an ram tan pawh a khel tawh bawk.

"Coach Mauricio Pochettino hoin season thar inbuatsaihna a kal mup mup reng tawh a, player thar leh rilru thar nen season thar khelh hlan kan nghakhlel tawh hle a ni," an ti.

An neihsa zingah Kai Havertz, Mason Mount, Mateo Kovacic, Kalidou Koulibaly, N'Golo Kante, Ruben Loftus-Cheek, Christian Pulisic leh Cesar Azpilicueta te chu an chhuak tawh thung.