Generation Z
Zir mite chuan Generation Z (90s chawhnu lam leh 2010 inkara piang) te khawvelah kan awm mek an ti. Infiamna khawvelah pawh hian a dik chho zel a, kan Mizo Infiammi meichher keng mek tute hian an tichiang awm e.
Tu nge Generation Z?
Internet leh technology nasa taka hmasawn hun laia piang, Zawlkhawpuia Cinema Hall hunlai hre pha ve tawh lo. Millennium inthlak laia khawvel êng hmu te an nih angin, sum leh pai hlutna hre chiang turin an rawn ṭhanhnan a. Mahni tana chakai khawrh leh a ruh no no chhuakah tih khawvela rawn seilian an nih tlat avangin, an tum a ruh (ambitious) a, an hmathlir pawh a thui a ni.
Chutihrual chuan, he inelna khawvel sang taka rawn zuang lut an nih avang hian, an khawvelah chuan rilru leh ngaihtuahna lam (mental health) harsatnate an nei nasa ta bik a tih theih ang.
Infiamna khawvelah pawh Sports Psychologist leh Mental Condition Coach-te thlenga an pawimawh tulh tulhna chhan hi thui tak a hril awm e. Thil tih nghal zung zung khawvela rawn seilian an nih avangin, he generation te hi chu minute 10 aia rei coaching leh lecture pek loh tur an ti reng a ni. Amaherawhchu, he infiamna khawvelah hian Generation Z ten ro an rel ṭan e, tih erawh hai rual a ni lo.
Zofate tan a ni zual!
Khawvel professional sports discipline-a langsar leh roreltute za zela 50 chuang hi he generation te hi an ni tawh. Mizoramah chuan tun hma rual u infiammi tam tak anlo awm ṭhin.
Zep thu a cheng lo, kan khawvel tawnin a la zir lo a, talent kha ei hmuhna khawpa chher tlâk a ni lo tlat. Hranghlui infiammi vannei ṭhenkhatte sorkar lamah hna an hmu ve ṭhin tih loh kha chu innghahna tur a vang a ni.
Gen Z hun a rawn inher meuh chuan, khuavel a danglam ṭan a, infiammite tan kawl a lo êng a; LZ Chhangte, Lalremsiami, Jeremy Lalrinnunga tihte chu kan Mizo hming tiṭhatu leh ṭhangthar lehzual an naute Generation Alpha an tihte tana kawng lo sial a, a sulsutu an ni ta mek a nih hi.
Ka tawnhriat
Khatia professional cricket-te kan han khel ve a, thil tamtak tawnhriat chawp leh inzir chunga kan han dai ve nawk nawk chhung khan, ka hun tawp lam season hnih vela Generation Z ṭhangthar hoin min rawn zawm belh ve zel.
An tumruhna leh an hmathlir te keini Genera-tion ai ngawt chuan a professional-in a danglam tawh zawk tih hai rual a ni lo. Khelmual chhung leh pawna an khawsak dan leh hawiher thlengin Oxygen thar rawn in pump lut ang deuh hian a tehkhin theih awm e.
Kar loah Joseph, Jehu, Remruatdika, Vanroa etc te leh tuna la lang lem lo season hnih thum an ral ang a; an hming kan thailan sek tur leh tun aia sang zawka Mizoram Cricket pawh rawn bawrh dawr tur hi an rawn inkat ta nuk mai a ni. "Gen Z kan ni a, thil kan ti ve mai mai ngai lo," tih hi an thupui a ni chek ang chu...