Final-ah Dominic Thiem a chak lo

Dominic Thiem chuan hun rei tak hnuah final a khel ve leh ta a, mahse Austrian tlangval hian an rama khelh Austrian Open hmawr bawkna inkhelah Argentine player Sebastian Baez chu 6-3, 6-1 in a ngam lo.

Thiem hi player ṭha leh theihna nei sang a ni, kum 2020 US Open nomawi pawh a lo chawi hial tawh. Mahse, a hnu lamah erawh banrek hliam vangin a buai chhunzawm reng a, tun thlengin ngai a la awh leh thei lo.

A ṭhat lai chuan world number 3 hial pawh lo ni tawh mah se, nikum khan chuan world number 352-a tlakhniam dawrh lai pawh a nei, tun hnaiah hma rawn sawn chho ve leh deuhin tunah chuan number 116 a ni ve leh ta.

Tun season kal laiah Thiem hi a match khelh hmasak 10 zinga pakuaah a tlawm vek, a tan chuan ngai awh leh beiseina pawh a tlem hman hle. Mahse, an ramah erawh final hial a thleng thei, tunah chuan tournament dang atan beisei a nei sang leh tawh ang.

Thiem hneha champion zui ta Baez chuan, "A hmuna inkhel entu zawng zawng khan Domi kha chak turin an duh tih ka hria, a chhan chu an ram mi a nih bakah hun rei tak hnua final khel leh a nih avangin an duhsak kha mak pawh ka ti lo.

"Nomawi ka chawi avangin ka lawm hle a, final ka khelh dan chauh ni loin kar tluana tournament ka khelh dan avangin ka lawm. Thiem hneh mah ila Austrian mipui ten min lawmpui thiam êm êm te khan min tilawm zual," a ti.