Hmeichhe World Cup: Champion lai USA an tla!

Nimin khan World Cup round of 16 aṭangin Sweden chuan USA an pet chhuak a, a zawna vawi hnih champion lai USA an tla - team pahnih hi minute 120 hnuah pawh 0-0 in an inhnehtawk a, penalty hmanga chak zawk zawn niin, 5-4 in penalty-ah Sweden an chak. Sweden tan keeper Zecira Musovic chu fak tlak a ni a, USA-in minute 120 chhunga shot vawi 22 zet an nei chungin goal a chhuah duh lo.

Sweden tana pettu pasarih zingah Nathalie Bjorn leh Rebecka Blomqvist ten an chhuih goal lo a, USA lamah pathumin an pet goal loh avangin Sweden an chak - US tana pet goal lo zingah an chhuanvawr Megan Rapinoe a tel a, Sweden an tlang.

Inrinni khan round of 16 hi khelh ṭan niin, inkhel hmasa berah Spain chuan 5-1 in Switzerland an sawp a, Swiss team-in a vawi khat nana World Cup quarterfinal luh an tumna chu a thlawn an chantir.

La Roja tan Aitana Bonmatí chuan goal hnih khungin, Alba Redondo, Laia Codina leh Jennifer Hermoso ten goal khat ṭheuh an khung bawk a, Switzerland goal awmchhun hi Laia Codina-i'n an lama a tihluh a ni - a vawi khat nan World Cup-a a thiam pariat zingah Spain hmeichhe team an tel.

Kum 2011 champion Japan-in group stage match thumah hnehna an chang vek a, last of 16-ah team ṭha Norway tum mah se harsatna an la tawng chuang lo. Norway defender Ingrid Engen turned Hinata chuan an lamah tilutin, Japan tan goal hmahruai a khungsak a, hei hi Guro Reiten chuan Norway tan a sut.

Mahse, Japan tan Risa Shimizu leh Hinata Miyazawa ten second half-ah goal khat ve ve khung ve lehin, Norway an pet chhuak - 1995 champion Norway-in World Cup dang chawi leh turin an nghah a la ngai.

Netherlands-in nimin last 16 inkhelah South Africa beiseina chu tihtawpsakin, 2-0 in an hneh bawk a, Dutch team tan Jill Roord leh Lineth Beerensteyn ten goal khat ve ve an khung - a vawi khat nana world champion nih tumin hmalam an pan zel.

World Cup 2019-ah khan Netherlands hian final lutin, USA an ngam lo a, kuminah final luh leh a, nomawi chawi ngei an tum. Netherlands manager Andries Jonker chuan, "Tupawh kan hneh thei tih inpawm thlap chungin World Cup hi kan pan," a ti a, champion a tum hle.