Hong Yang lakah Prannoy vanduai

India tlangval badminton khelh thiam HS Prannoy chuan Australian Open 2023 final hial a thleng a, mahse nimina nomawi inchuhna inkhelah Chinese player Weng Hong Yang lakah 21-9, 21-23, 22-20 in a vanduai zawkah a ṭang.

Weng-a'n set khatna chu 21-9 in a la, harsa vak loa chak tlang mai tur niin a lang hman. Mahse, game hnihnaah beisei phak bakah ṭhain Prannoy a rawn tho chhuak a, champion zawk hre turin game thumna khelh a ngai.

Game thumna boruak a sang, tumah an kal fal thei lo - point khat lek pawh hmuh belh a harsa takzet, vawi 71 tehmeuh shot rally neih ṭum pawh a awm hial, a tawpah erawh Weng a vannei ta zawk.

Player pahnih hi Malaysia Masters 2022 final-ah pawh khan an lo intawng tawh a, world number 24 Weng chak zawkin hemi ṭum hian kum ruk chhunga a vawi khat nan nomawi a chawi, tunah lawmna dang a tawng leh ta a ni.

Tournament-ah hian PV Sindhu pawh a inlan a, mahse Olympic medal vawi hnih la tawh Sindhu quarterfinal palltang zo loin a zinkawng a lo tawp tawh, tun hnaiah a result a ṭhat loh em avangin world ranking-ah pawh 17-naah a tlahniam tawh a ni.