Boxer tel an tam beisei

Tualchhung boxing inelna lian LPS Pro Fight a hnai a, inelna hmachhawn tum tan August 15, Thawhlehni aṭangin entry form lakchhuah theih a ni dawn. Inelna buatsaihtu lam chuan nikum aiin boxer inlan an tam an beisei thu an sawi.

Pro Fight hi kum 2009 aṭanga 2019 thlengin amateur huang chhungah professional zulzuiin promotional fight vawi riat buatsaih a ni a, 2022-ah professional fight tiin thlak a ni.

Kum kal taah professional kalphung zui a nih avangin Mizo boxer eng emaw zatin harsatna an tawk a, amatuer huanga khel zui thei lo tura hrem an ni dawn tiin vau lawk an ni. Hei vang hian tel ngam lo eng emaw zat awm mah se weight hrang pangaah mi 211 ziah luh an ni a, promotional fight hnuhnung ber 2019 aiin boxer tel pangain an tam zawk. Hei vang hian organising committee chuan tam zawk an inlan theih an beisei thu hi an sawi.

Pro Fight-in profes-sional kalphung zui tawh mah se inhnek tam zawk chu promotion fight a nih lai ang thoa kalpui a ni a. Nikumah semifinal aṭangin professional chhinchhiahna boxrec-a ziah luh chauh a ni a, a hma lam zawngah boxer-te tan professional a nih avanga harsatna tawhna tur a awm lo a, kuminah title fight chiah boxrec-ah ziah luh tur a ni dawn.

Nikumah 48 kg aṭanga 70 kg inkar tan, weight hrang panga - fly, bantam, feather, light leh welter huangah tel theih a nih laiin, kuminah weight tipung chuang loin huam zau zawkin ruahmanna thar siam a ni a, 48 kg aṭanga 74 kg thleng huamin fly, bantam, light, welter leh middleweight-ah tel theih a ni dawn a ni.

Organising Committee chuan Mizo boxer tam zawk an tel theihna tura siam rem a nih thu sawiin nikum angin pawn lam aṭanga boxer rilru tichiaitu tur boruak dang a awm tawh lo turah a ngai bawk.

Chuvangin inhnekna mamawh boxer tam zawk tan kawng hawn a ni a, August 15 aṭangin LPS office, Zarkawtah Mizoram chhung leh pawn aṭangin a duh apiang tan form lak chhuah theih a ni dawn a, September 20 thlengin theh luh theih a ni ang.