Lianzuala'n goal a khung leh tawh

Durand Cup khelh mekah Mumbai City chu Inrinni tlai khan a vawi khat nan an inlan a, an match hmasa berah Mohammedan SC chu 3-1 in an hneh nghal - he inkhelah hian Lallianzuala Chhangte chuan goal a khung.

Mumbai tan hian Rostyn Griffiths leh Jorge Pereyra Diaz te chuan goal khat ve ve khungin, minute 35-naah Lianzuala chuan a belhchhah ve leh bawk - AIFF Player of the Year ni lai Lianzuala hi season hmasa khan Durand Cup top scorer a ni tawh a, tun season-ah Golden Boot dawn nawn a tum ang.

Kolkata club lian Mohammedan tana goal awmchhun khungtu pawh Mizo tho a ni a, Aizawl FC striker hlui David Lalhlansanga chuan a khung - Calcutta Premier Division khelh mekah pawh David-a hian goal ruk khung tawhin, Mohun Bagan forward Suhail Ahmad Bhat (7 goals) chiah a phak lo mek.

Inrinni inkhel dangah Bodoland FC leh Rajasthan United te intawngin SAI Stadium, Kokrajhar-ah 0-0 in an inhnehtawk a, Zirtawpni zan khan Northeast United FC chuan 4-0 in Shillong Lajong an sawp thung.

Highlander tan hian Parthib Gogoi chuan hattrick siamin, Romain Philippoteaux chuan penalty aṭangin goal khat a thawh ve bawk - Lajong-in a chhanletna tur an nei lo.

Nimin lama inkhel hmasa zawkah Delhi FC leh Hyderabad FC chu 1-1 in an inhnehtawk. He inkhelah hian Delhi tan Himanshu Jangra chuan goal hmahruai khung mah se, Hyderabad tan Kolasib tlangval Ramhlunchhunga chuan si phurh sutna goal a khung - hun tawp thlenga goal dang khung tawh loin, 1-1 in inkhel a tawp.