A changtupa nih a ngai - Alonso

Fernando Alonso chuan Formula 1 chu ennawm ropui leh hmuhnawm a ni tih a sawi a, chumi huangah chuan driver tam tak an inel thu leh a changtupa nih theih chu thil pawimawh leh an tum ber a ni tih a sawi.

Spanish driver hian tun hmain F1 title vawi hnih a la tawh, a vanglai a pelh tawh avangin a lakah beisei a sang tawh lo, a team awmna Aston Martin chu Red Bull, Mercedes leh Ferrari te elphak lo tur niin a lang bawk.

Mahse, kum 42 mi Alonso hian beisei phak baka ṭhain season a hmang mek, nipui chawlh an hman thlenga an tlan tawh chinah point 149 hmuin championship table-ah pathumna a ni mek.

Alonso chungah hian Red Bull driver pahnih Max Verstappen leh Sergio Perez te chauh an awm a, a nihna takah chuan Mercedes leh Ferrari driver-te chuan an chung en mek tihna a ni.

Aston Martin driver Alonso chuan, "Formula 1 hi infiamna ropui leh hautak zet mai a ni a, chutihrual chiah chuan ennawm ropui tak a ni bawk. Inelna hmun tlankawng leh a pawn lamah mi ṭha bik nih theih a pawimawh hle.

"Kan chanchin hi miten an ngaihven reng a, chuvangin chanchin ṭha leh ngaihnawm neitu nih zel kan tum a ngai, hei hi a bik takin driver naupang leh tawnhriat la nei tam lo zawkin an hriatchian a ngai," a ti.

Alonso hian F1 huangah chuan hun a nei tam tawh lo tih a chiang a, eng chena rei nge car intlansiakna sang ber hi a hmachhawn zel dawn tih erawh sawi theih a ni lo, tun season tawp ruala chawlh mai erawh a la tum lo.

Alonso chuan, "Pawimawh tak mai pakhat chu miten kan intlansiak an la en châk em tih leh, kan lakah beisei an la nei em, tih kan hriat a ngai. Thil eng emaw tithei tura min la beisei a nih chuan tihhlawhtlin tumin ka bei zel ang.

"A nihna takah chuan tun season ṭan dawn pawh khan mipui lam chuan kei leh Aston Martin kha min beisei sang lo. Mahse, team khan ka lakah rinna an nghat a, tun hi kan thleng thei tih chu a takin kan hmu," a ti.

F1 hian season chanve an zo a, tunah hian nipui chawlh an hmang mek. August 27, Pathianni tlaiah Dutch Grand Prix an tlan leh ang, an intlansiakna tur hi Verstappen-a te ram a nih avangin Alonso tan el a hautakin a rinawm.