Man City lakah Arsenal an chak 'NGAM' ta

Arsenal chuan Premier League champion an tum ngam tih an lantir, season hmasa lama an ngam loh - hun rei tak chhung an ngam hleih theih loh ni bawk Manchester City an ngam ta.

Pathianni zan FA Community Shield inkhelah Arsenal leh Man City te hun pangngaiah 1-1 in an inhnehtawk a, penalty shootout hmanga chak zawk zawn a nih hnuah Gunners hi 4-1 in an chak.

Wembley Stadium-a inkhelah Man City tan substitute Cole Palmer chuan minute 77-naah goal hmahruai a khung chauh a, hun tawp hma chiahin bench aṭanga lut ve tho Leandro Trossard chuan a sut.

Arsenal tan captain Martin Odegaard, Leandro Trossard, Bukayo Saka leh Fabio Vieira ten penalty an khung vek. Man City tana pet hmasa ber Kevin de Bruyne leh Rodri ten an hlah a, pahnihnaa pet Bernanrdo Silva khungin awmzia a nei lo.

An fimkur tawn

Premier League season ṭan nan chawlhkar khat chauh a awm tawh a, player tan inhliam a hlauhawm. Pep Guardiola leh Mikel Arteta te pawhin an naute fimkhur turin an chah ngun tih a chiang a, in tih nat an hlau.

Khup hliam vangin Gabriel Jesus a inlan thei lo a, tlarhma laiah Kai Havertz chuan bul a ṭan, a hnungah Declan Rice, Thomas Partey leh Martin Odegaard te an intlar a, defender thar Jurrien Timber chuan bul a ṭan bawk.

Man City pawhin damkawr Kevin de Bruyne chu bul an ṭantir duh lo, tun hnaia Bayern Munich nena sawi zawm Kyle Walker chuan captain armband a rawn hreng a, Etihad Stadium chhuahsan thei zinga mi midfielder Bernardo Silva pawh bul ṭantu zingah a tel.

Walker leh Silve te hi Guardiola chuan chelh turin theihtawp an chhuah tur thu a sawi chiang tawh a, midfielder thar Mateo Kovacic chu bul ṭantu zingah telin, keeper Ederson aiah Stefan Ortega chuan bul a ṭan thung.

Goal hnih

Vawi khat tihsual pawizia an hrechiang a, tisualtu ni lo turin an fimkhur takzet. Mual sir aṭangin defender Ben White-a'n mawi zetin ball a la lut a, forward Bukayo Saka chuan Havertz tan a siamsak zui.

Germany international hian a hlah, keeper Ortega a paltlang thei lo; ball per hi Gabriel Martinelli chuan lo chang fuh leh mah se a shot chu defender John Stones-a'n a lo dansak - Man City an him phawt.

Saka bawkin Havertz tan a siamsak leh a, mahse Chelsea forward hlui hian a khung leh chuang lo, keeper Ortega bawk a ngam lo. Bench aṭanga minute 64-naa rawn lut Palmer erawhin laklawh nei miah loin minute 77-naah Man City tan a khung thung.

Kevin de Bruyne, Phil Foden leh Palmer an luh hnuah Citizens an hlauhawm zual a, goal khat an keng tel bik lo thung. Hun tawp dawnah Saka a thawk hah thlawn ta lo, a ball pek dawngtu Trossard chuan siphurh a sut zo, penalty-ah an vannei zui.

Chutihrualin Arsenal hian pre season-ah penalty pet an zir ṭha. MetLife Stadium-ah mipui 82,000 hmaah Man United nen penalty an pet tawh a, an chak lo. Emirates Stadium-a Monaco nen friendly match an khelh ṭum pawhin penalty an pet a, an chak thung. Vannei satliah an ni lo, inpuahchahna ṭha rah a ni.

Puitling zia

Arsenal hian season hmasa khan ni 248 chhung chu Premier League-ah hma an hruai, mahse an champion lo. Champion chuang si loa hmahruaitu ni rei thei ber record an siam, thil duhawm tak a ni hran lo.

Season tawp dawnah nasa takin an zuih a, an elpui Man City ngeiin an sawp a nih kha. Arteta-a'n EPL champion turin squad thuam chak a ngai tih a hria, nipui bazarah Declan Rice, Kai Havertz leh Jurrien Timber te a lei.

Player thar pathum hian Man City lakah inkhel bul an ṭan vek a, duhthusam lohna lai deuhte chu la nei mah se an result-ah an lungawi ang, a bik takin defender Timber khelh danah Gunners fans mit a tlung hle.

Community Shield champion hi EPL champion tur tihna a ni kher lo, kum 2011 aṭang khan shield la hi league-ah vawi khat chiah an la champion zui, mahse Arsenal tan erawh an elpui City ngam kha inrintawkna siamsaktu pawimawh a ni.

Chak lo nawn

Season hmasa khan Manchester City hian Community Shield an khel tho a, an elpui Liverpool an ngam lo, season pangngaiah erawh Reds hian Pep Guardiola naute an el phak lo hle. Kum 2021-ah pawh City hian Community Shield-ah Leicester City an hneh lo a, Premier League-ah erawh nomawi an chawi tho.

Captain Ilkay Gundogan thlaktu Kovacic-a'n German midfielder hmun ruak a la luah khat tawk lo a, defender thar Josko Gvardiol an la chhawr thei lo; an nih dan tur takin an la khel lo tihna a ni.

Striker Erling Haaland chu William Saliba leh Gabriel ten an chepral, season hmasa khan Norway international strriker hian goal 52 a khung thei tho tih erawh hriat a ngai, a 'nil' reng tawp lo ang.

Chutihrualin Man City hian hnathawh hmabak erawh an nei, defender Walker leh Silva te chelh an tum a ngai dawn, an player ṭha pahnih hi an chhuak hlauh a nih chuan team indinthar leh turin hun an mamawh dawn a ni.

Player thar pathum lakah Arteta a lawm

Arsenal manager Mikel Arteta chuan team ṭha tak - Premier League, Champions League leh FA Cup champion kawp Manchester City el phak turin an inpeih tih a sawi a, a player thar Declan Rice, Kai Havertz leh Jurrien Timber khelh danah a lungawi bawk.

Arteta chuan, "Team ṭha leh ropui kan el thei a ni tih a takin kan lantir, harsatna leh buaina chi hrang hrang chu a thleng thei ngei mai, chutihrualin keinin pawhin theihna kan nei a ni tih kan lantir avangin ka lawm.

"Rice, Timber leh Havertz te hian nasa takin min pui dawn. Kan player zingah inkhel thei lo ṭhenkhat awm mah se, kan neih tharte hian nasa takin squad an tichhah, hei hi season tharah a pawimawh dawn," a ti.

Nomawi chungchang sawi zuiin Arteta chuan, "Football kan khelh chhan chu nomawi chawi a ni a, a bik takin Wembley Stadium-ah ngei mai min ṭan tute hmaa hlawhtlinna chan chu a lawmawm hle.

"Hna hmasa ber tur Community Shield chu kan tihlawhtling ta phawt a, a dawt leh chu sawi lawk theih erawh a ni lo. Theih ni se la chuan title dang pawh lak kan duh, tunah chuan a dang kan ngaihtuah chhunzawm ang," a ti.

Guardiola-a'n chak loh a pawm

Pep Guardiola chuan a chang chuan an duh loh result an pawm a ngaih chang a awm tih a sawi a, season thara hman ṭan tur dan thar chu hriatthiam ngai deuh tur a nih thu a sawi bawk.

Pep-a chuan, "Manchester City hi team ṭha tak kan ni a, mahse a chang chuan kan chak lohna kan pawm a ngai. Penalty pet a ni a, keini lam aiin Arsenal tana penalty pettute kha an ṭha zawk," a ti.

English Football League referee-te chuan season thar aṭangin hun pek belh chungchangah dan thar an hmang dawn. Qatar World Cup lai ang khan goal khung lawm leh hliam vanga hun khawhral zawng zawng kha a tawpah an pek belh leh vek dawn.

Community Shield-ah pawh he dan hi hman a ni a, minute 90+11-ah Arsenal lamin an siphurh an sut chauh, hun pekbelh pangngai kha minute riat a ni a, mahse hun pek belhah player hliam an awm avangin an khelh belh.

Guardiola chuan, "Tunah chuan match tinah minute 100 khel tura kan inbuatsaih a ngai dawn. Ka ngaihdan chuan hun pek belh vak hian awmzia a nei lem lo, player hah belhna tur chauh a ni," tiin an dan hman tur chu a ngaina lem lo.