United ṭantuten Maguire an ‘boo’

Manchester United chuan Pathianni zan khan pre season match hnuhnung ber an khel a; Aviva Stadium, Dublin-ah Spanish club Athletic Bilbao nen 1-1 in an inhnehtawk.

Erik Ten Hag-a hote hian Inrinni zanah RC Lens an hmachhawn avangin La Liga club an hmachhawn ṭum hian starting eleven an thlak hlawk a, bul ṭantu zingah hian Harry Maguire, Aaron Wan-Bissaka, Christian Eriksen leh Jadon Sancho te an tel.

Minute 29-naah Maguire-a pass sual vangin Bilbao-in goal an khung a, Nico Williams-a'n goal hmahruai a khung. England international defender Maguire hian chetsual a la bansan lo a, United ṭantute zingah pawh a tla na tawh lo. Dublin-ah pawh hian United fan-te ngeiin an au el.

Maguire hian a tihsual a siam ṭha leh a, injury time-ah Facundo Pellistri khung tur a siamsak. Uruguayan winger hian ṭha zetin a volley goal.

United player thar Rasmus Hojlund chu hliam tenau a neih avangin a inlan thei lo a, Anthony Martial a tel loh bawk avangin Jadon Sancho chuan false nine hna a thawk. Sancho hian a ball thiamna a pholang a, amaherawhchu keeper Unai Simon chauh a hmachhawn hnuah a khung lo.

Manchester United hian Premier League match hmasa berah Wolverhampton Wanderers an hmachhawn dawn a; August 14, Thawhṭanni zan dar 12:00 hian Old Trafford-ah an inkhel ang.