Aizawl FC hmaa ding tur Venghnuai

Tualchhung football-ah Aizawl FC hi tun hnaia team ṭha bera ngaih ni mah se season liam ta khan nomawi an chawi lo. I League club hian I Day Football final-ah Mizoram Police an hneh lo a, MPL semifinal-ah FC Venghnuai an hneh lo bawk.

Vawiin chawhnu dar 1:30 hian MSSC Ground, Muallungthuah Aizawl FC leh FC Venghnuai te an inkhel dawn a, coach Victor Lalbiakmawia hote hian season liam taa an hneh loh team hi hneh ngei an tum ang.

Aizawl FC tan player thar Lalrinzuala a che ṭha nghal a, goal thum a khung tawh. Chutihrualin season liam taa player-te an la rintlak a; Lalramsanga leh K. Lalrinfela te hmangin midfield an thunun a, tlarhnungah Lalmuanawma (Munez) leh Rohmingthanga te an rintlak viau bawk.

I League club tan draw a tawk avangin Venghnuai hi chak mamawh zawk an ni a, attacking football an khelh a ngai dawn. Coach James Rammuanawma'n AFC winger R. Lalthanmawia, Augustine Lalrochana, R. Ramdinthara leh Lalbiakdika te dan dan tur a ngaihtuah rualin goal an khung dan tur a chhut tel a ṭul ang.

Venghnuai hian Chhinga Veng aṭanga an lakluh Jerry Lalchhanchhuaha chu tlarhmaah rinrawlah an hmang a, mimal pakhata innghahna tur player an nei lo thung. Team angin an khel a, Aizawl FC tan pawh fimkhur a ṭul ang.