Messi hoin Inter Miami an chak

Lionel Messi an neih chinah Inter Mimai chuan hmel danglam an nei a, tun hma lama chak dan thiam lo khan tunah chuan chak dan an thiam ta - Messi tel ve chinah an la chak vek.

Nimin zing khan Messi-a goal hnih chhawr ṭangkaiin Inter Miami chuan FC Dallas an hneh.Team pahnih te hun pangngaiah 4-4 in an inhnehtawk a, penalty shoot out hmangin Miami hi 5-3 in an chak zui a ni.

Major League Soccer League (MSL) leh Mexican club-te, knockout hmanga inelna Leagues Cup khelh laiah Inter Miami hian quaterfinal an lut. August 11, Zirtawpniah an inlan leh dawn a, an khingpui tur erawh a la hriat loh.

Toyota Stadium-a inkhel tur hian ball an pet hma aṭangin ngaihven a hlawh. Messi-a'n Inter Miami a zawm hnuah khualmuala match a khelh hmasak ber tur a ni a, ticket pawh an zawrh chhuah aṭanga minute 10 lekah an hralh zo vek.

An inkhel ta ngei a, minute rukna lekah Messi chuan a thiam dan takin goal a khung. Mual sir lam aṭanga ball an rawn cross chu box pawn deuh aṭangin a hlap lut zawt.

Dallas lamin Facundo Quigon (37'), Bernard Kamungo (45') Alan Velasco (63') leh Robert Taylor 68' (OG) te hmangin an vaw let a, Miami chuan Benjamin Cremaschi (65') leh Marco Farfan 80' (OG) te hmangin goal an neih belh bawk.

Mualneitu Dallas lamin chak turah an inngai hman, mahse minute 85-naah box sir lamah freekick an chawi, a pet turin Messi a rawn ding chhuak - Argentina captain hian goal ban leh a kham intawhna lai kilah tak a chhuih lut a, si phurh a sut zo.

FC Dallas coach Nico Estevez chuan, "Kan chak niah ka ngai tawh a, midang pawhin kan tlang turah an ngai vek tawk. Dinhmun khirhkhan takah kan dah hman a, mahse a tawpah Messi chuan a rawng chingfel leh ta vek si," a ti.

Inter Miami coach Tata Martino chuan, "Goal khat chauh sut let mai hi chu a theih a, a aia tam suta hnehna chan let chu thil awlsam a ni tawh lo. Amaherawhchu, keini team chuan midang neih loh kan nei," tiin Messi a dahsan thu a sawi ve bawk.

Barcelona leh Paris Saint German forward hlui Messi hian Inter Miami tan match li a khel tawh a, goal sarih khungin assist vawi khat a nei tawh bawk, a goal khung zingah hian freekick aṭanga chhuih luh vawi hnih a tel.