Mbappe-a'n first team zingah training a nei lo
Paris St-Germain first-team squad chuan nimin khan Ligue 1 atan training an ṭan a, mahse, hralh an duh, chhuak duh bawk si lo Kylian Mbappe chuan club training hi a zawm ve lo - club leh France captain inkar boruak a ṭhat loh chhunzawm zel.
Mbappe hi Real Madrid nen sawizawm a ni a, season lo awm tur hman zawh rualin PSG-a a contract hi a tawp dawn. PSG chuan a contract hi pawtsei turin an dawr a, mahse, French forward hian a hnar.
PSG chuan nakkum nipuiah an striker hi a thlawn maia chân an duh bik lo a, contract thar a ziak duh lo a nih chuan man a neih theih laia hralh an duh - mahse, Mbappe ber hian a contract hman zawh a tum lawi si a, hei vang hian PSG leh Mbappe hi an buai a ni ber.
Hetiang boruak karah hian PSG chuan Asia lama pre-season tour an neihah pawh Mbappe hi an hruai duh lo a, tunah first team training-ah an telh lo leh ta - Mbappe hi PSG-a hma hun chiang lo, a hrana training nei ṭhin player zingah dah a ni a, player 15 an awm mek nia sawi a ni.
He squad hi an hraw hle - Mbappe bakah chhuak thei dinhmuna ding Julian Draxler, Leandro Paredes leh Georginio Wijnaldum te chu he squad-ah hian an tel.Hetiang boruak karah hian Mbappe a insum duh lo a, French forward hian a ṭhiante hnenah hian inkhel ta ngat se, PSG first team chu an hneh theih a rin thu a sawi niin Sky Sports reporter Kaveh Solhekol chuan a sawi.
PSG hian tun hnaiah Mbappe hi an dawr leh nia sawi a ni a, season tawp ruala hralh a nih nan 'sale clause' thlenga dah club lam chuan an rem ti. Mahse, Mbappe hian contract thar hi a ziak duh ta chuang lo a, tun season-ah a chhuak lo a nih chuan khelmualah kan hmu lawk dawn lo niin a lang.
Mbappe hi Saudi Pro League club Al Hilal chuan khawvela footballer man to ber ni turin, pound maktaduai 259-in an lo dawr tawh a, PSG-in he dawrna hi pawm mah se Mbappe ber hian Al Hilal hi inbiakna a neihpui duh lo.
Hetihlai hian khawthlang media ṭhenkhat chuan Mbappe aiawhte chuan Madrid lamah in an zawng ṭan der tawh niin an sawi a, Mbappe kal theihna zingah Liverpool leh Chelsea hming lam ri an awm bawk.