GIG Motors I Day Football - A tawpa thil thlen theih dan

GIG Motors I Day Football 2023-ah MPL club-te group pahnihah ṭhen an ni a, group pahnih hian round khat ve ve chauh khelh an mamawh tawh. Team tinin match khat chauh khelh tur an nei tawh nachungin semifinal lut an la awm lo a, tla pawh an la awm lo - beiseina an la nei vek.

Group A

Aizawl FC : I League club hi vawi hnihah an chak ve ve a, semifinal lut chiang turin point khat a tawk. Chutihrualin AFC hian FC Venghnuai an hneh lo a, Chanmari FC-in Electric Veng FC an hneh chuan tla thei an la ni. AFC hi an goal difference a ṭhat avangin Venghnuaiin goal hnih tala an hneh a nih pawhin I League club tla tur chuan Chanmari FC-in goal thum tala Electric Veng an hneh a ṭul dawn.

Chanmari FC: Chanmari FC hi an chak a nih chuan an dinhmun a ṭha a, inkhel dang result a zirin chak pawhin tla thei an ni. Chutihrualin chak lo pawhin tling thei an la ni tho bawk. K. Malsawmkima hote hi khel hmasa tur an nih avangin nuamsa zawka AFC leh Venghnuai inkhel an thlir theih nan chak phawt an mamawh ang. Chanmari hian Venghnuai an hneh miau avangin head to head-ah an ṭha zawk a, match hnuhnung bera point khat ve ve an hmu a nih chuan Mala hote goal difference chhe zawk mah se semifinal lut zawk tur an ni.

FC Venghnuai: Electric Vengin Chanmari FC an hneh a nih ngawt loh chuan Venghnuai tan chak a ngai dawn. Match hnuhnung zawk khel tur an nih avangin an goal mamawh zat nen lam an hre sa vek dawn a, chutihrualin Chanmari FC laka goal hnih an khung hnua goal thum an chhuah avangin hmabak erawh a harsa dawn. Venghnuai, Chanmari, leh AFC te hi point ruka group stage khar thei vek an ni a, hei hi a thleng a nih chuan Venghnuai tan Aizawl FC chunga awm turin I League club hi goal hnih china an hneh a ngai ang. Chutihrualin Venghnuai hi goal khat chauh pawhin chak se, Chanmari hi goal khat chauha an chak chuan semifinal an lut tho ang.

Electric Veng FC: Electric Veng tan semifinal lut turin Chanmari FC an hneh ngei ngei a ngai. Mahse, an goal difference hi -5 a nih avangin Chanmari chunga awm tur pawhin goal thum tala an chak a ngai a, a harsa dawn. FC Venghnuai chunga awm turin Aizawl FC puihna an mamawh tel a, I League club hi an chak chian poh leh Electric Veng dinhmun a ṭha ang.

Group B

Chhinga Veng: Chhinga Veng hi vawi hnihah vawi hnih chak tawh mah se MPL champion lai Chawnpui an hmachhawn dawn a, nuam sa takin group match hnuhnung ber an khel thei lo ang. Chhingcows tan semifinal lut turin point khat a tawk a, an chak loh erawh chuan tlak theih dan a la awm. Goal hniha an chak lo a nih chuan Chawnpui hnuaiah an awm dawn. Chutihrualin inkhel dang result hre saa inkhel tur an ni a, inkhelh hma pawhin semifinal an lut thei bawk.

Mizoram Police FC: Mizoram Police-in injury time-ah Chhinga Veng an hneh lo a, semifinal luh a harsa sawt dawn. Lalbiaksanga Colney hote hian Project Veng FC an hmachhawn dawn a, match hmasa zawk an khelh dawn avangin chak phawt a ngai. Chutihrualin Police hian goal sarih ngawt an khung tawh a, hei vang hian goal khat leka chak pawhin an dinhmun a ṭha dawn a, goal hniha an chak theih phei chuan an himah a ngaih theih ang.

Chawnpui FC: Chawnpui FC-in match hmasa bera Police an inlehthaltir avangin dinhmun harsa zawkah an ding a, chutihrualin vannei taka Project Veng FC an hneh avangin beiseina an la nei. Lalrindika Hmar hoten Police inkhel result hre sain an khel dawn a, chutihrualin head to head-ah Police an hneh loh avangin eng result pawh thleng se point hmuh hrim hrim a ngai. Chawnpui tan hmun hima awm turin goal hniha chak a ngai.

Project Veng FC: Project Vengin point an la hmu lo a, an khelh hmasak zawk dawn avangin beisei nei chungin Police an hmachhawn dawn. Kolasib club tan Police chunga awm turin goal hniha chak a ngai a, Chhinga Veng puihna an mamawh bawk ang.