East Bengal an chak zo lo

Indian Super League club East Bengal-in Bangladesh Army lakah goal hnih khung mah se an chak zo lo a, 2-2 in an inhnehtawk. Kolkata club hian midfielder Saul Crespo (penalty) leh forward Javier Siverio hmangin first half-ah goal hnih an khung.

Mohun Bagan-in 5-0 ngawta an lo sawp tawh Bangladesh team lakah East Bengal hi awlsam takin an chak dawn emaw tih laiin, Bangladesh club tan Shahriar Emon leh Meraj ten goal an khung a, 2-2 in inkhel a tawp daih - Bangladesh Army hian minute 88-na leh injury time-ah goal hi an khung a ni.

ISL club Odisha chu nimin inkhelah an inlan bawk a, Indian Army nen intawngin, Zothanpuia khelhna Indian sipai team lakah 1-0 in an tlawm - inkhela goal awmchhun hi Liton Shil khung niin, Shil hi minute 77-naah hnawhchhuah ni mah se reserve leh academy player nena khel Odisha an 'comeback' thei lo.