A thiam pariat zingah England

Hmeichhe World Cup last 16-ah England an chak a, Nigeria nen hun pangngaiah 0-0 in inhnehtawk mah se penalty-ah 4-2 in hnehna an chang - quarterfinal an lut a, a vawi khat nana champion an tumna kawngah kawng dik an zawh zel.

England hian group stage match thumah hnehna chang vekin, point nga hmua last 16 lut Nigeria lakah harsatna nei lo tura ngaih an ni. Mahse, England nulaten goal khung an harsat a, goalkeeper Mary Earps che ṭha lo se mualpho thei an ni!

Manchester United keeper Earps hi a che ṭha takzet - England tana age level-a inlan, senior team-a Nigeria tana khel Ashleigh Plumptre khung tur nia lang a dan te, Uchenna Kanu hun ṭha neih a dansakte chu keeper ṭha mi a nihna pholangtu a tling.

Minute 87-naah Michelle Alozie laka a chet dan mawi lo tak avanga England chhuanvawr Lauren James hnawhchhuah a nih avangin England tan extra time a harsa lehzual tawh a, goal chhuah loa minute 120 an khel tluan chu an vannei hle.

Team pahnihin goal khung loin minute 120 an thlah liam a, penalty hmangin chak zawk zawn a ni - England tan Georgia Stanway chuan a chhuih goal loh laiin, Nigeria lamah Desire Oparanozie leh Michelle Alozie ten pet goal thei loin, 4-2 in England an chak.

Nimin tlai quarterfinal inkhel dangah Australia leh Denmark intawngin, inelna thlengtu Australia hian 2-0 in hnehna an chang - vawiinah round of 16 hi khelh zawh a ni ang.