Siverstone-ah Espargaro a chak ber

Bike intlansiakna sang ber MotoGP season chawhnu lam an hmang ṭan. Pathianni zantir lama tlan zawh tak British Grand Prix-ah Aleix Espargaro a chak ber a, a hnungah Francesco Bagnaia leh Brad Binder te an thleng.

Silverstone tlankawngah Bagnaia chuan hnehna chang phak lo mah se, pahnihna a nih chu rider championship lama hmahruaina sawhngheh nan a tawk, a elpui ber Marco Bezzecchi chu chesualin a tlan tluan ve thei lo a ni.

Beiseina chu

Spanish rider Espargaro-a'n tun season kal lai atan a vawi khat nan hnehna a chang a, hnehna chang tur hian lap hnihna lek aṭanga hmahruaitu Bagnaia chu lap hnuhnung berah a tlan pel.

A tirah 12-na aṭangin Espargaro hian intlansiak bul a ṭan, hnehna a chan tak avang hian rider championship lamah pawh paruknaah a invawrh kai a, season chawhnu lam an hman ṭan chauh avangin nomawi a la beisei ngam ang.

Aprilia bike khalhtu Espargaro chuan, "Tihsual ka ngahin hun ṭha ka neih ve theih tur pawh ka bawhpelh hnem ta hle a, a nihna takah chuan tun ṭumah pawh khan qualifying lamah chuan ka tlan ṭha tawk lo leh hle.

"Keimah leh keimah ka infuih a, intlansiak tak Pathiannia kan tlan hunah chuan ka chak ber tur a ni tih chu ka thupui a ni. Tlankawng a huh deuh a, chutiang kara ṭha taka ka tlan thei khan min tilawm takzet," tiin a sawi.

Pahnihna Bagnaia

A chak ngei dawn nia a lan hnuah Bagnaia-a'n a hmahruaina a hum thei lo a, chutihrualin pahnihna nih chu a tan result ṭha a tling tho. Championship table-ah amah hnaih bertu Marco Bezzecchi aiin point 41 zetin a sang fal ta.

Kum 26 mi Bagnaia hian Silverstone tlankawngah dan a bawhchhe teuh hle, bike tlan theihna chin chhinchiahna chu a pel hman hial niin mi ṭhenkhat chuan an sawi a, hei vang hian hrem tur nia ngai pawh an awm.

Tlankawngah hian bike tlan theihna tur chin bituk a awm, chumi pela tlan vangin season chawhm lam khan Assen GP-ah pawh Brad Binder chu hrem a lo ni tawh, tun ṭumah erawh Bagaina hian dan bawhchhiat a nei lo niin thuneitu lam chuan an sawi.

Season hmabak a la tam a, inelna a la hmuhnawm chhunzawm dawn tih a chiang. August 20, Pathianni tlai dar 5:00 hian Red Bull Ring-ah Austrian Grand Prix an tlan chhunzawm leh ang.

Buaipui ngai Marquez

Rider ṭha chungchuang bik a ni a, record ṭha zawng zawng pawh rawn khum thei tura ngaih a ni. Mahse, Marc Marquez-a'n hliam na tak a tawrh hnuah ngai a la awh leh thei lo, pangngai takin a lo kir leh thei ang em, tih chu zawhna a ni.

British GP an tlan hma hian Marquez chuan, "Mi ṭhenkhat chuan bike intlansiak hi ka tan chawlhsan a hun tawh thu min hrilh," tiin a sawi hial a, inelna hmachhawn mah se chesual lehin a tlan tluan ve thei ta lo.

Spanish rider hian 14-na aṭangin intlansiak bul a ṭan a, kawng kawiah Franco Morbidelli nen intipalhin beisei a phak leh ta lo a ni. Marquez chuan, "Inrintawkna ka nei chho ve leh ṭan a, mahse a bul ṭhut a fuh thei tawh lo a ni.

"Intlansiakah kan chesual a nih chuan rilru a khingbai duh hle, chutihrualin engmaw zawng tal hian hmasawna ka neiin ka inhre ṭhin," a ti a, vawi ruk a champion tawhna MotoGP chu mangṭha turin ngaihtuahna a la seng rih lo tih a sawi bawk.