Carlos Alcaraz a inringtawk

Mipa tennis world number 1 Carlos Alcaraz chuan tunkar chhunga khelh tur Canadian Open atan a inringtawk tih a sawi a, season hmasa lam aiin hard clourt-ah hian khelh ṭhat theih a inbeisei.

Wimbledon nomawi a chawi hnuah Alcaraz hian mimal inelna a la hmachhawn lo, an ram Spain tan Hopman Cup erawh a khel a, mixed doubles team hmanga inelnaah hian beisei ang result an nei thei lo thung.

Kum 20 mi Alcaraz chuan, "Season hmasa khan Canada ramah hian tournament ka khel ṭha tawk lo tih ka la hre reng, kuminah chuan thawnthu danglam leh ṭha zawk ziah tumin ka zin lut.

"Nikum lama ka chet ṭhat lohna aṭang khan thil tam tak ka zir chhuak, tournament inkarah pawh thil a thleng tam leh tawh hle, chuvangin kuminah chuan thil a danglam ka beisei," a ti.

Nikum Canadian Open leh kumina an khelh inkarah Alcaraz hian inelna hrang hrangah final vawi ruk a khel a, chung zingah chuan vawi nga a champion - a hlawhtlinna zingah US Open leh Wimbledon pawh a tel hial.

Seeded pakhatna a nih avangin Alcaraz hi first round-ah chuan a inkhelh hah ve a ngai dawn lo, a bye hmasa phawt a ni. Bernabe Zapata leh Ben Shelton te inkhela chak zawk a hmachhawn ang.

Alcaraz bakah hian hard court hmang thiam hmingthang Danill Medvedev leh Casper Ruud te an inlan dawn bawk a, player ṭha pathum hian champion turin theihna an nei sang tawk vek, inelna a hmuhnawm dawn.