Van de Beek leh Sociedad an indawr

Manchester United midfielder Donny van de Beek chuan Old Trafford-a bench luahlum reng ai chuan chhuahna tur zawn mai a thlang a, La Liga club Real Sociedad nen an indawr mek.

Kum 2021 khan Donny van de Beek hian beiseina sang tak nen United hi Ajax aṭangin a pan a, a man zat pawh pound maktaduai 35 zet niin Red Devils tan hmun pawimawh chang tura ngaih a ni.

Mahse, a season hmasa berah inelna hrang hrangah match 36 a khel tling thei hram a, a hnu season hniha a inkhelh zat belhkhawm phei chu match 24 chauh a ni - beisei a phak lo hle.

Season hmasa ṭan dawna United-in Erik Ten Hag an lakluh khan, Ajax lama a boss hlui hnuaia vul leh tura beisei a ni a, mahse, inelna hrang hrangah match 10 chiah inlana goal khung nei loin season a khar - pre-season match-a Lyon an hmachhawn ṭum khan 1-0 a an chakna goal a khung a, Old Trafford hotute an hmin phah lo niin a lang.

United hian Ten Hag-a'n nipui transfer-ah a player duhzawng a lakluh theih nan player ṭhenkhat hralh an tum a, an hralh tum zingah Van de Beek hi a tel hrim hrim niin khawthlang media-te chuan an tarlang.

Goalkeeper Dean Henderson chu season hmasaa loan-a a khelhna Nottingham Forest-ah kir tura ngaih a ni a, chutihrual chuan January-a a hliam avangin pre-season match pawh a la khel miah lo a, hei hian a dinhmun a tichiang lo.

Ivory Coast defender Eric Bailly pawh Ten Hag-a ruahmannaah a tel loh avangin club thar zawng tura zalenna a neih thu hrilh a ni a, Fulham chuan Fred lakluh tumin an hel bawk.

Mahse, Premier League club hian he thu buatsaih a nih lai hi chuan an ngamna zat nen chiang taka United dawrna an la nei lo - Van de Beek, Bailly leh Fred te hi nipui transfer-ah an chhuah ngei a rinawm.