PSG player thar tur Goncalo Ramos

Paris Saint-Germain chuan Benfica aṭanga Goncalo Ramos la lut turin Portuguese club hi inremna an neihpui a, a man atan euro maktaduai 80 an theh chhuak ang - he thuziak i chhiar meuh chuan an inla lut fel tawh hial mai thei.

French club hian kar hmasa khan Ramos bik hi chu inremna an lo neihpui tawh a, a man chungchangah an inrem leh ta. Chutihrual chuan PSG hian €80mtd hi vawi khatah an pe vek dawn lo a, €65mtd chu pe hmasain, a bak €15mtd erawh a khelh ṭhat dan a zira pek leh tur a ni.

PSG hian financial fair play rule avangin Ramos hi a nghetin an la lut nghal thei dawn lo nia sawi a ni a, loan-in PSG hi a zawm phawt ang a, nakkum nipui transfer-ah a nghetin a zawm chauh ang.

French club hi Victor Osimhen, Rasmus Hojlund leh Harry Kane te nen pawh sawi zawm an ni a, mahse, a tawpah chuan Ramos lam an hawi ta zawk.

Kum 22 mi forward hian PSG player man to lamah Neymar leh Kylian Mbappe chiah a phak lo tihna a ni a, season hmasaa a chet dan ngaihtuah chuan a man hi a to hran lo.

Portugal international hian season hman zawh takah khan inelna hrang hrangah match 47 zet khelin goal 27 a khung a, assist vawi 12 an nei.

PSG hian Ramos hi an en thla rei tawh hle nia sawi a ni a, a French club-a football advisor hna thawk mek Luis Campos leh Ramos-a agent Jorge Mendes-te chu ṭhian ṭha niin, he contract hi an tihfel theih phah nia sawi a ni.

Ligue 1 champion hi Kylian Mbappe tel loa hun hmang turin an an inthuam ṭha mek a, tun hnai khan Barcelona aṭanga Ousmane Dembele la lut turin inremna an nei tawh a, Eintracht Frankfurt forward Randal Kolo Muani an rim mek bawk.

Anni bakah hian player langsar zingah Bayern Munich aṭangin Lucas Hernandez, Real Mallorca playmaker Lee Kang-in, Real Madrid chhuahsantu Marco Asensio leh Inter Milan centre back Milan Škriniar te an la lut tawh - coach thar Luis Enrique hoin season thar an hmachhawn dawn a, an ṭang hle.